今日係情人節，所以八方呢排見親啲議員都會問吓，會點過情人節？最多議員話同老婆出街食飯慶祝，而最有吉士就係大狀黨嘅梁家傑，夠膽唔同太太出街慶祝。
傑哥新春留港消費，噚日重去咗城市論壇，佢話，同老婆年年都唔會出去食飯，因為情人節食個飯都要比平時貴三倍，「冇理由要出去俾人鋸！」
傑哥見八方唔係幾信，佢就講多兩句，話太太Carol完全支持呢個做法，唔單止喺屋企食飯，送花都係一樣，情人節嗰日啲花又係比平時貴三倍，所以都唔會買花送畀太太！
由於家中賢妻唔使特登陪，所以傑哥今晚好放心繼續為人民服務，佢今晚會同黨友吳靄儀坐鎮A45網上電台，講政府諮詢架構嘅問題。
（圖）梁家傑（右二）噚日出席城市論壇，大讚學生講嘢有板有眼，重同佢哋逐一握手。張家俊攝
傳真︰2623-9278
電郵︰