泛海（129）年三十晚收爐價0.39元，相對本月頭配售9.65億股，每股伸手價0.38元，只係升咗2.6%，重未夠喉。
連新增配股計，泛海最新市值19.7億元，晒士細細，但手頭土儲（油塘、香港仔及油柑頭），講緊樓面110萬平方呎，土儲之多，揮低幾十億市值企業之餘，家陣阿媽滙漢（214）系投資及酒店物業，幾乎全部由泛海揸住，泛海孭重飛，阿媽係咪食大茶飯，要靠泛海。
泛海因應呢次配股，集資到3億幾（主要用作補地價），發展逾百萬呎土儲，家陣大牛市，每平方呎賺上1000蚊，唔係難事，集資3億，換上潛在逾10億純利；又或者等土儲發霉，無錢落袋，點揀？
再講，泛海配股之前，有外資行大鑼大鼓，為名也好，為利也好，泛海係咪就係如此這般？照大行唱好目標價0.54元計，比對因配股攤薄後每股資產值0.71元，重有折讓水位，好安全，而呢潛在近40%股價回報，大孖沙先嗒落有味。
閩信（222）假前忽然異動，升貼50日線，又講兩點。第一，閩信每股資產值2.7元（04年6月止），重未秤過，折讓40%，窗口股當中，邊嚟得好似閩信咁大折讓？第二，閩信揸住廈門國際銀行36.75%，只係以應佔廈銀權益資產值入帳（4.9億元）。入帳方式，略嫌實得滯。呢期市傳交通銀行已經來港入紙申請上市，跟住重有中銀及建行，上市之時，肯定以資產值倍數定價。到時，焦點之一，係市場為閩信及廈銀應有豐厚價值平反，兼且係一年幾劑。趁交銀上市之前，閩信要收集。
錢雋