我冇讀過電影學院，但係我估課程內容一定有講到片種嘅分類。其實都係個普通常識，朋友叫你去睇戲，求其講個戲名你未聽過，你都會問：「係乜嘢戲嚟㗎？」答案都係嗰幾個：「愛情片，喜劇，動作片，驚慄片咁上下嘅嘢。特別啲嘅會係鹹片。」不過年近歲晚就有啲新意，大家都會話不如睇番套「賀歲片。」
「賀歲片」係一種好地道，好中國嘅文化，類型上大部份係喜劇，有時係動作片。相信大家都記得成龍大哥有十年時間陪伴大眾市民度歲。聽過好多的士司機講每年只會在過年時候一家大細去睇一套戲。我問佢哋揀乜戲睇，大部份都會答：「成龍大哥啲戲，不過近幾年都冇囉，大哥去咗荷李活，啲鬼佬唔興拍賀歲片。」真係聽落都有少少酸酸哋，其實大哥一路都喺香港，不過係製作環境同氣氛改變咗，令大型動作片需要更加精密嘅市場觸覺，配合龐大推廣策略才會回本。
近年睇過最好嘅賀歲片係「嚦咕嚦咕新年財」。我覺得好厲害，因為佢示範咗作為賀歲片類型既富娛樂亦言之有物，最後重做到恭喜發財嘅結局，的確厲害。如果年年都有部咁上下嘅賀歲片睇吓就好囉。
今年兩部賀歲片都未睇，聽朋友講話麻麻哋，唔夠好笑，但係我都會去睇，因為我覺得「睇賀歲片」本質上已經係一件好開心嘅事，大家想像吓如果你身在異鄉，農曆新年嘅時候去唐人街戲院睇番套賀歲片，最尾劉德華出嚟同你拜個年，真係成個人開心晒。