農曆新年聽得同講得最多的，應該是「恭喜發財」，第二呢？大抵會係「買定離手」！鬼咩，新年流流唔賭番兩手，重有乜細藝？之不過鼓吹賭博並非本人作風，正如玩魚蝦蟹都唔一定匿喺屋企，趁假期有時間多，何不到以下兩個年中無休的釣魚釣蝦場，改玩真實版魚蝦蟹，一樣好玩又有Fun！
記者：尹珊珊
攝影：楊錦文
模特兒：Blanche、Johnny（StarAsia）
上白泥：新釣魚場勝地
忽然心血來潮想釣魚，最方便當然是光顧釣魚場，勝在無釣具、無經驗，也可以大享垂釣樂。別看Blanche與Johnny仔是釣魚初哥，對魚場資訊可熟識得很，聞說元朗上白泥有「新釣魚場勝地」之稱，即興高采烈朝流浮山進發。叫得做「新釣魚場勝地」，上白泥果然當之無愧，Blanche一數：「大大話話有成五六個釣魚場，又真係幾多選擇喎！」一輪視察後，我們最後扑鎚往迴旋處附近的一個釣魚場，貪其魚穫種類繁多，大花尾、黃立䱽、大星驢、金鮕、青班、頭鱸、石蚌、牙點、金䱽、斑爐等條條肥肥白白，釣起來零舍有滿足感，而且魚塘四周建有欄杆，安全設施比其他釣魚場充足，玩起來也特別安心。
熱心釣魚郎教路
放眼所見，釣魚場內已有十數個釣魚郎正在奮戰中，Blanche同Johnny仔怕執輸，拿拿臨從老闆孫先生手中取過魚竿和魚餌，便飛身往塘畔走去，「嘩，人人都已經有收穫，我哋都鬥快睇係邊個釣得多囉？」年輕人少不免心浮氣躁，二人忘了釣魚最講耐性，幸好在魚塘垂釣較易上釣，又得熱心釣魚郎相助，好好醜醜都有條三四斤重的星鱸上釣，臨走前孫先生建議：「魚穫可以買返屋企加餸喎！」善心Blanche婉拒：「話晒釣開有感情，我寧願放生都好過食落肚。」
白泥、紅樹林、海魚養殖場（24721925）
地址：元朗流浮山上白泥村43號
收費：每人每支魚竿全日$60，取走魚穫每斤$30至$100，視乎種類而定。
營業時間：星期日至五8:00am至12:00mn，星期六通宵營業，年中無休。
交通：元朗泰豐街乘33號專線小巴（$7）過流浮山迴旋處，叫紅樹林釣魚場下車。
直擊爆笑釣魚！
開波，搵個好位等笨魚上釣，Johnny仔先攞頭彩，殊不知：「啋，乜條魚反肚嘅？」
市區：蝦蟹即釣即燒
話明玩魚蝦蟹，齋釣魚唔夠過癮，一行人即由元朗殺落佐敦的釣蝦場，老闆李先生早已等候多時，即時向Johnny與Blanche傳授釣蝦秘技：「釣蝦要有一支靈活彈性特強的蝦竿，首先量度魚絲長度，浮標對下的魚絲唔可以過長，蝦餌亦應緊貼池底，因為蝦只會浮沉在水底，蝦餌貼底有利大蝦上釣，耐不耐郁一郁，等啲蝦以為有美食喺水中飄浮。」咁易？拋絲放餌，開波！
新增釣蟹玩意
心急，即衝向由兩個相連釣蝦池合而為一的釣蝦區，一心等大蝦上釣。未幾，Blanche好似發現新大陸咁大喊：「咦？點解個池底有咁多蟹嘅？」李先生解釋：「係呀，𠵱家新加咗釣蟹，玩法同釣蝦差唔多，但難度高好多，睇彩數。」5分鐘過去，二人面前的尼龍網仍然空無一物，別說是蟹，就連蝦都無隻，待Johnny仔終於Feel到有蝦上釣，卻衰心急搞到得個吉，「要慢慢將魚絲拉起直至露出水面，太大力隻蝦會彈番落去㗎！」多得李生從旁教路，30分鐘後，Johnny仔以2隻大蝦之差險勝Blanche，美少女當堂扁嘴，Johnny仔都好識做，拿拿臨畀錢將戰利品加工煮食，博回美少女一笑。
