新春大吉，高官議員齊齊放假，政壇無事少啲爭拗，市民耳根難得有幾日清靜，45條關注組立法會議員湯家驊就同老婆乖仔去印度避年。湯大狀從政後公務繁忙，平日都唔係幾多時間陪屋企人，趁新年假一家三口去泰姬陵觀光，途中重見到醫管局前主席梁智鴻，但由於佢身在車上，大家只能揮揮手打個招呼。
湯大狀返香港後又好唔得閒，要為將軍澳海悅豪園商場個議員辦事處搞開幕禮，個新辦事處之前由民建聯楊耀忠租用，舊年選舉前被指涉嫌擅自幫人登記做選民個婦女會，就係掛單於此。楊耀忠𠵱家冇位落腳告別立法會，個辦事處自然要摺埋。呢個辦事處最大特點就係有個超大玻璃櫥窗，除咗可以貼海報當做報告板，重會掛幅湯大狀大相當做生招牌，街坊可於今個月二十日（下個星期日）去捧場。
另一議員大班鄭經翰新年則留港消費，佢話自己係最傳統嘅中國人，新年留喺屋企休養生息，加上平時早出晚歸，呢幾日年假最好陪吓老婆同三個仔，但佢留喺屋企都唔係好得閒，因為唔少親朋戚友都去佢間山頂大屋拜年𢭃利是。
大班休息幾日又要開工，位於橫頭磡邨個新辦事處喺年初八（星期三）開幕，大班話當日係好日，已邀請多位高官出席，但剪綵儀式則由一班義工做主角，佢話議員係為人民服務，冇義工幫手，佢未必做到議員。
傳真︰2623-9278
電郵︰