2R現時正在家鄉新加坡與家人共度新歲，兩姊妹透露每年家中都會擺放桃花，全家人年年都行桃花運。2R又謂父親盼做公公，竟催她們快些生仔。
新加坡姊妹花2R現於星洲老家，與家人共度佳節。日前家姐Rosanne和妹妹Race為感受香港的新年氣氛，專誠往銅鑼灣一中國茶館學泡中國茶，二人雖然是初學者，但總算有板有眼。
2R表示獅城的新年習俗與香港大同小異，兩姊妹須嚴守新年「三不准」規條，她們異口同聲說：「年初一我哋唔可以洗頭、唔可以掃地、唔可以攞刀同鉸剪。要着新衫，食長壽麵，食年糕。我哋喺香港冇親戚，新年返去可以𢭃坡紙，我哋重會用利是封整燈籠㖭。」
2R表示家人每年都會買桃花，問她們是否因此桃花運盛？Rosanne笑說：「唔知呀，係爹哋買嘅。」Race卻插嘴說：「𠵱家啲女仔好似大膽啲。」Rosanne即時解釋說：「我爹哋嗰間舖頭有好多後生仔女喺度做嘢，爹哋有好多女仔追㗎，但係媽咪同佢一齊做嘢，一齊返工，所以知道爹哋每日做啲乜嘢。不過媽咪都有人追㗎！」
對於早前有報道指Race與上市公司主席、范文芳前男友拍拖，而Rosanne則與見習牙醫發展地下情，2R笑說：「都唔係真嘅，我哋係識咗好耐嘅朋友咋。」問2R有否許願在新年覓得真命天子？Rosanne即笑說：「唔使搵男朋友，爹哋話直情生仔啦，因為佢好想喺五十歲前做阿公，所以佢成日都會幫眼睇吓啲男仔，好搞笑㗎。」
採訪：朱倬誼
攝影：仇志德
