梁詠琪（GiGi）於今個農曆大年初一撇甩家人和男友鄭伊健，到美國出席時裝騷，故惟有透過電話越洋跟他們拜年。至於新年願望，GiGi則希望專注製作出色的唱片，令事業更上一層樓。
梁詠琪這個農曆年初一要在工作中度過，未能與家人和男友鄭伊健歡度新春。GiGi表示今年要努力賺外快，她日前接受訪問時說：「其實每年新年我都會放假，但係今年實在太多嘢做，我會去美國出席一啲商業活動，所以年初一唔會喺香港，去完美國之後就要返嚟錄國語碟，好彩我屋企人會去旅行，所以就唔使擔心佢哋冇人陪。」
GiGi又表示雖然年初一不在港，但她一早派定利是給公司同事。問GiGi回港後會否四出拜年，她說：「細個就話好恨收利是啫，𠵱家都咁大個人，冇乜所謂啦。」
談到未能在年初一到男友鄭伊健家中拜年時，GiGi只輕輕帶過說：「冇辦法，惟有打電話拜年啦。」問到她新一年有甚麼新年願望或大計？GiGi說：「今年我想再放多啲時間喺唱片上，上年我覺得做得未夠好，同埋自從做咗舞台劇之後真係上咗癮，如果有機會我會再參與多啲。」
問GiGi會否進修？她說：「我諗其實通過喺舞台上學習，重好過去進修，所以我會爭取多啲表演機會。」
採訪：胡比攝影：林德雄
服裝提供：裕華國貨
