今次安東尼與占士嘅大戰，除咗吸引到逾二萬名觀眾之外，重有一位「不速之客」──就是因腳傷之前話唔會隨隊出征的湖人球星拜恩；不過克利夫蘭的球迷就好似唔係咁鍾意佢，當球場的大電視影佢同球迷揮手，全場一齊狂噓，唔通因為後日要對湖人，先畀佢一個下馬威？
NBA球賽之所以吸引人入場，除咗比賽本身之外，各式的周邊活動亦居功不小；好似賽前有人幫你免費畫面、噴頭髮（圖一右）之外，暫停同半場亦有上至魔術，下至縮骨功的表演。派禮物方法更加層出不窮：有人用槍射畀你、有人掟畀你，更加有用降落傘喺場館天花放落嚟，真係點到你唔服美國人嘅伎倆！
睇NBA之外，睇啦啦隊亦都係一大樂趣，不過比起湖人同火箭，騎士的CavaliersGirls質素就差啲啦，所以都冇合照的打算。走嗰陣見有個細路女畫咗個好靚嘅騎士隊徽喺面，諗住同佢影張相，點知企喺隔籬啲三個啦啦隊以為我對佢哋有興趣，重話幫我揸機，咪免為其難合照囉！
記者雷海彬克利夫蘭直擊
