雖然正式的農曆年假已經完結，相信大部份港人重好有Holidaymood，數日連環式東南西北拜年後，想真正唞吓吸啖新鮮空氣，不妨近近哋上番禺玩一兩Day，因為長隆夜間動物世界上星期開始有新搞作，科幻馬戲團一定睇到小朋友拍爛手掌，玩得激啲可到附近全中國最大的廣州鱷魚公園，學捉鱷魚、食鱷魚宴兼買手信，一家大細最啱玩！
記者：長金 部份攝影：木文 模特兒：Joey
即劏即食鱷魚宴
眾所周知鱷魚有治哮喘之效，好多人出門旅遊都會買鱷魚乾做手信，不過講新鮮好味，鱷魚乾點都唔及即劏即整的鱷魚肉，咪以為喺廣州鱷魚公園食個鱷魚宴好貴，即使大排筵席都平過你喺香港酒樓食餐飯呀。鱷魚皮肉皆可食，長隆集團御用大廚林師傅則認為鱷魚尾最好味，可能鱷魚擺得多尾，啲肉都嫩啲啩！
10萬條鱷魚全國最多
廣州鱷魚公園距市中心只有3公里，佔地面積2,000畝，內有鱷魚足足10萬條，全國稱冠，難怪當日香港要捉貝貝時，也要從這裏邀鱷魚釗相助，因為他平時對鱷魚重多過對人！這裏的鱷魚分觀賞、表演、食用及製造皮革等類別，而在表演項目中，觀眾不但可以睇，夠膽的話更可以落場，在鱷魚先生教導下親自試吓捉鱷魚滋味。
同鱷魚BB合照
食飽飽，梗要活動筋骨幫助消化，除了睇表演及學捉鱷魚外，公園內還劃分了很多不同區域供大家觀賞，如鱷魚區、鱷魚孵化區、爬行動物區以及瓜果園等，有排你行，鍾意嘅重可以同鱷魚BB影相留念㖭！
買手信返屋企
食飽玩夠，重硬係差啲嘢咁，當然就係香港人至鍾意的Shopping！公園內有一類似超級市場的店舖，專門售賣鱷魚及地道產品，大家必可滿載而歸。
新項目
科幻馬戲《月球侏羅紀》
屬同一集團的長隆夜間動物世界，則可以賞到各種各樣的動物、奇幻的國際大師魔術表演、還有澳洲水上特技等等，不過最值得注目的，就是在上星期才上演的《月球侏羅紀》，這充滿科幻味道的馬戲表演，由俄羅斯國家馬戲公司總裁扎巴斯內主理，故事發生於2108年，首批地球移民踏上月球，卻遇上月球的潛在邪惡勢力，展開一番激戰……結局係點？自己睇喇！
有用資料
1.廣州鱷魚公園
地址：廣州番禺大石
電話：（86）20-84796100
入場費：每位?60
開放時間：9:00am至6:00pm
網址：www.chimelong.com
交通：太子砵蘭街京港酒店側乘直通車直達番禺長隆酒店（平日$80，假日$100，車程約3小時），再轉乘免費穿梭巴士直達。
查詢：永東旅遊有限公司34126677
2.長隆夜間動物世界之《月球侏羅紀》
地址：廣州番禺大石迎賓路
電話：（86）20-84796600
入場費：成人?145，小童半價，包夜間動物世界內所有遊戲及《月球侏羅紀》表演入場費。
開放時間：4:30pm至12:00mn
交通：太子砵蘭街京港酒店側乘直通車直達番禺長隆酒店（平日$80，假日$100，車程約3小時），再步行3分鐘即達。
查詢：永東旅遊有限公司34126677