歌神開騷要常滿七成點夠？
許冠傑不滿吉位：唔爆就派飛

歌神許冠傑（Sam）去年復出一共舉行了三十八場演唱會，場場爆滿，他在農曆新年間再開騷，但入座率大不如前。阿Sam前晚見只得七成觀眾，即大發牢騷，勸藝人不要在農曆年開騷，又揚言若尾場不爆滿，就免費派飛益歌迷。

許冠傑去年復出，在紅館開了四次共三十八場演唱會，每次均引來fans通宵輪候購票，場場爆滿，氣勢銳不可當。
歌神在年三十晚開始在紅館舉行「05歌神賀歲嘉年華」六場個唱，前晚大年初二繼續在紅館開騷，為遷就fans欣賞維港煙花滙演而延至晚上九時半才開場。然而，前晚入座率僅得七成，阿Sam忍不住在台上說：「我本來諗住○五年暑假或者喺聖誕假開騷，點知啲期俾人book晒，得番農曆新年六日期，問我做唔做，咁我咪話做囉，點知就跌咗落個陷阱度。」

好易滿足
「愈少人愈精神」
阿Sam續說：「不過，我好易滿足嘅，愈少人我就愈精神，呢啲就係專業精神啦。但我勸啲人都係唔好喺農曆新年開騷，因為啲人走晒，年三十晚人人要食團年飯，七點半開騷，搵鬼嚟睇咩？我諗住演唱會搞多啲嘢睇，做多啲宣傳，點知年初一好多報紙都唔出，觀眾想買飛，啲售票處又唔開，呢日年初二重衰，要放煙花，成九點半先至可以開場，五個鐘頭嘅節目又要cut，如果觀眾兩點幾唔走嘅話，我都會唱到兩點嘅。」

谷爆尾場
「企門口等派飛」
阿Sam寄望昨晚年初三觀眾的反應會好一點，否則他將派飛免費請觀眾入場睇騷，阿Sam說：「如果最尾嗰場都唔爆嘅話，大家就企定喺紅館門口，我會叫人派飛畀你哋。」
演唱會負責人陳達志（Ba叔）昨日就阿Sam前晚台上所言回應說：「阿Sam講笑啫，今次演唱會反應好好，年三十晚有八成幾入座率，跟住呢幾晚都有九成幾，而十三號尾場就全部爆滿，所以唔會派飛，亦都冇話要減價賣飛。而年初四晚劉德華會做嘉賓，尾場就有古巨基。」

點半完騷
安歌觀眾已離場
前晚擔任演唱會嘉賓者，包括有女子十二樂坊、女生宿舍和梁洛施（Isabella）。Isabella一向畏高，故她與阿Sam坐在飛船表演時顯得格外緊張，雙手緊握繩索，阿Sam見狀遂扶她一把。而阿Sam唱到昨日凌晨一時三十分才完場，但因為凌晨一時二十分安歌時，不少觀眾以為完騷而紛紛離場，阿Sam見狀在安歌時唱了一首歌，便跟觀眾揮手道別。
採訪：胡比