過年前打開報紙，赫見潮界經紀「鬍鬚弟」大頭相一張，暢談創作心得，印象令人深刻。老實講，鬍鬚弟係本地潮界生意人中，較為進取嘅一個，識得講之餘仍肯努力去做，每季都有一兩個Project推出，既解決生計，又可過吓創作人多姿多采嘅生活，曝光率唔少，有得威又搵到水，此為真正「威水」也。聽佢講有個親戚喺波鞋街開舖，最近連番吐苦水：「本來個波鞋親戚搵我搞個Project，點知碰啱業主加租，冇乜Budget（財政預算），計劃惟有臨時Hold住。其實舊年開始，唔止香港，全球嘅波鞋生意都麻麻。上個月，專幫名牌波鞋牌子造貨間上巿公司公布業績，點知低於預期，股價應聲下跌，咁就證明巿道並非預期中咁好。𠵱家波鞋街啲租鬼咁貴，仍有一兩間大舖爭住要，其實玩緊汰弱留強遊戲，十足隔籬西洋菜街兩個電器零售集團爭位咁熱烈，有時倒轉頭諗盤生意咪發咁大重好；洗大個頭，好難收科。好似班走水貨嘅後生仔咁，養兩間舖，幾個夥計，條數已經好好喇！」佢所指理應係水貨大亨袁仁祥。聽講最近祥哥賣特別版Visvim執到唔少，原來佢哋提供埋幫客人剪鬚服務，將Zucca×Visvim鞋上，充滿悠閒氣息嘅印第安式麖皮鬚，修剪到適合客人需要，唔怕拖晒地整到對鞋污糟邋遢；咁鬼體貼，唔怪得咁好生意。
主持人：大食Jack
八卦熱報：[email protected]