尊貴的議員助理Ｐ來電約食飯，問佢近況如何，助理Ｐ嘆曰：「辛苦。每晚八點放工，攬住大堆文件返屋企，食完飯又繼續做功課，星期三立法會議前，要為議員寫演講稿、發言稿。呢碗飯好難食，特別係𠵱家大issues太多，領匯啦、機管局上市啦、兩電利潤管制協議啦、填海啦，數到你口攰，重有立法會委員會啲開會文件、歷史資料……我哋做議員助理嘅，其實要搵助理！」
做「議員助理助理」，有幾多人工呀？佢唔再講，於是左丁山去八吓，問吓一啲富貴議員嘅助理。富貴議員用完政府津貼之後，動用私人錢請職員，好輕鬆啫，請幾多個都得。富貴議員助理話：「助理助理，通常係畢業兩年嘅大學生，中英文良好，對特區政治有認識，肯刻苦耐勞，晚晚開夜，犧牲拍拖時間為議員搵資料、寫草稿，識電腦上網、PowerPoint，最好識埋中文打字……」夠嘞，咁多條件，出幾多錢先？富貴議員助理話：「萬二蚊一個月啦。」
有志於政治嘅，或可考慮，做助理助理、助理，競選區議員，最後競選立法會議員，晉身行政會議成員，競選特首，二十四歲開始，五十四歲做特首，算唔算發夢呀？起碼有得諗先，唔係倔頭路。競選輸咗又點？咪屢敗屢戰囉，選咗呢條路，千祈唔好望發達，做中產都係掹車邊啫。如果認為呢條路太辛苦，不如就下海從商，四十五歲發達，成為名人，發到好似羅康瑞咁，仍然有希望競選特首。
富貴議員助理聽左丁山咁講，忍住笑話：「唔好講到咁長遠，我只係想有份糧嚟供樓啫，老闆如果不能連任，我就會失業，要搵過第二份，所以我嘅眼只睇到四年，唔係三十年。」