大家好，好開心今年又有機會同大家直擊在丹佛舉行的明星賽。屈指一算，已經係第三年有幸去採訪呢項盛事。今次比較特別，是明星賽之前先到訪克利夫蘭，現場感受一下占士大帝的威力，並且現場直擊騎士主場分別迎擊金塊、湖人及鷹隊的三場賽事。當然，最希望有機會可以親身做到大帝的訪問。
這位年僅二十歲的少年球王，不但技術全面且出色，爆發力亦非常驚人，早已成為「NBAAction」十大金球倒數的常客。今次可以現場直擊LBJ比賽，當然好興奮；不過難度亦比之前高。因為直擊呢三場占士的比賽，完全係孤身走我路：之前無論明星賽、中國賽抑或常規賽，都總有NBAAsia或其他亞洲傳媒一齊，大家有個照應，唔似得今次完全孤軍作戰；真係想搵人幫手影幾張相都成問題。
對比起上次明星賽目的地──充滿加州陽光的洛杉磯，今次無論是克利夫蘭，或高於海拔近一哩而有「MilesHighCity」之稱的丹佛，都可謂差天共地；單是氣溫，一來一回相差成三十度（上星期丹佛和克城都試過接近攝氏零下二十度），難怪台灣《Hoop》主編Robben一早同我講，唔會去呢處「凍到鼻都甩」、「兼行兩步都索氣」嘅鬼地方。
點都好，老套講句，睇米高佐敦係「有今生、無來世」的話；睇「占士大帝」，至少都此刻無價！幾辛苦，都值㗎！記住明天為大家直擊占士Vs安東尼。
記者雷海彬克利夫蘭傳真
