上海妹周麗淇年紀輕輕，但過年習俗做到足。她又動手學做盆菜，不過從未食過盆菜團年的周麗淇表示，平時食飯不敢用筷子摷，但食盆菜則亂摷才滋味。
周麗淇日前到位於旺角跟師傅學製盆菜及紅燒蟹肉翅，打算在新年與家人吃盆菜團年。周麗淇將鮑魚、蠔豉、花膠、海參及中蝦等十多種材料按次序排放，她說：「我都未試過食盆菜團年，平時同人食飯一定唔敢用筷子摷，驚俾人話冇禮貌，不過師傅話食盆菜一定要摷亂嚟食先夠風味，十幾種材料撈埋夠晒入味喎。」
祖籍上海的周麗淇表示每逢過年家中便會擺滿各式各樣的家鄉食品，她說：「我阿爸同阿媽都係上海人，團年一定唔少得整湯圓，阿婆重會親自炒豆沙做湯圓同紅豆飯，重有用菜肉做鹹湯圓㖭。」
周麗淇表示由於親戚眾多，每逢過年家中更是洋溢着一片熱鬧氣氛，她說：「啲親戚到齊都有二、三十人，個個都講上海話，一見人就要講『恭屎發傘』，即係恭喜發財咁解，不知幾熱鬧。」
周麗淇透露家中過年有特別多習俗禁忌，包括要穿上全新內衣褲及禁止掃地，她說：「可能班長輩喺香港住得耐，近年開始被廣東人同化咗，已經冇以前咁嚴，細個喺年三十沖完涼，要等到初二先可以再沖，阿婆以前重會按習俗開鑊，開鑊炸油角嗰陣更加唔可以講啲唔吉利嘅嘢，試過睇住阿婆炸油角炸到起泡，淨係講咗句一鑊泡，即刻俾阿婆趕出廚房。」
採訪、攝影：卓美娟
化妝：NaviLambyTripleEdge
髮型：NicholYipbyHair
