同屬寰宇旗下的羅嘉良、李彩華（Rain）和梁俊一日前趁着喜氣洋洋的新春佳節，一同舞獅賀歲，阿Rain負責擊鼓，嘉良與梁俊一舞佛山樁獅，恭祝讀者龍精虎猛。
羅嘉良、李彩華和梁俊一日前齊於將軍澳舞獅迎新歲，兩位壯男負責舞逢喜慶節日必出的佛山樁獅，嘉良舉獅頭，梁俊一舞獅尾，女將Rain擊鼓助威，一片喜氣洋洋。
其後嘉良又穿上長袍及手執葵扇扮大頭佛，逗得Rain和梁俊一哈哈大笑。提起舞獅，原來嘉良是「舞獅能手」，他笑說：「因為阿叔送咗個獅頭畀我個仔玩，阿仔耐唔中就攞個獅頭出嚟舞，咁啱電視播緊《我師傅係黃飛鴻》，佢一路舞獅一路話自己係黃飛鴻，我就舞獅頭，同埋畀個仔舞。」
嘉良新年期間往美國三藩市，與鄧萃雯和馬景濤登台，然後與妻兒會合在當地避年，他說：「有時間嘅話，都會去吓嗰邊嘅賭場玩吓，睇吓會唔會贏少少新年財。新年願望就希望世界太平，唔好有天災。」
至於Rain新年亦會出埠登台，她說：「我會同黃品源、徐懷鈺去美國康州登台，之後會去拉斯維加斯旅行，到月尾至返香港，所以新年都應該冇乜利是。以前細個跟阿公出去𢭃利是，係勁多㗎，可能呢幾年經濟冇咁好，自己臉皮又薄咗，利是都少咗好多。」
而梁俊一則說：「我有個朋友喺荷蘭返嚟，佢會去圍村同啲親戚過年，呢個新年我會喺香港，所以會陪朋友一齊去圍村、食盆菜同燒炮仗，過年都係同屋企人食吓飯、𢭃吓利是咁，重希望今年可以考車牌。」
採訪：朱倬誼 攝影：陳偉權
便服提供：SistyrMoon
醒獅、醒獅服裝及道具提供：郭氏功夫金龍醒獅團
