新車速報：<br>大發MoveCustom新年新裝

新車速報：
大發MoveCustom新年新裝

可以話係KCar始祖嘅大發Move，一踏入05年就嚟個大變身，而且重唔係加少少嘢又話係新版嗰隻。鬼面罩、頭尾燈霧燈、泵把甚至係品牌徽章都係新設計，由車頭到車尾都咁有新鮮感。加埋新車已落足大泵把、霧燈、裙腳等正料，買返嚟唔使改已經好夠襯！

記者：馬慶武　攝影：陳盛臣

有望重振KCar熱潮

相比起三、五年前，KCar熱潮近年已經冷卻咗好多。雖然潮流不再，但係好似Move呢類細車仔慳油可愛、車身輕巧，再配上Turbo引擎補身，實在好啱香港嘅駕駛環境，無論係喺鬧市攝位或者公路揼盡啲都一樣啱「駛」。今次Move新形象登場，有型靚仔，有足夠實力回復KCar熱潮。

側鏡配指揮燈大突破

05年版Move嘅外形嚟咗個大革新，唔少部份都令人有一見鍾情之感。車頭泵把兩層式燈組合、上指揮燈下霧燈設計有型有新鮮感！車尾直排式透明尾燈組合更極有CyberFeel，與車身同色兼配備指揮燈嘅側鏡更係KCar突破裝備。頂部細小尾翼連煞車燈、車頭大泵把連擾流、車側裙腳亦令Move散發辣K味道。
雖然一台Turbo引擎只有659cc，但以過往經驗推斷，用於喺870kg嘅4人車身上已經好足夠，如果只係載住女朋友，更加可以揼得快啲。較細嘅15吋胎軨亦有利於起步加速，反應敏銳轉向靈活係Move嘅先天優勢。

全新造型更勝同級

裝有一條反光板嘅尾泵把線條同舊版有分別，同樣有好強嘅貼地感。

■明亮嘅放射式頭燈造型精緻，靚過好多同級對手。

■跟車身同色嘅側鏡加置指揮燈，係KCar嘅一大突破。

■一格格嘅尾燈係個人覺得最有型嘅部份。

■15吋合金胎軨，令Move嘅轉向更靈活。

■車尾頂部較長，形成細細嘅尾翼線條，襯晒車身唔係咁大嘅車仔。

■車身短小，最啱穿插香港車貼車嘅街邊泊位。

四方車身實用率高

雖然車仔細細，但係四四方方嘅車形令到車廂空間更實用。採用軚波設計，前排連體座椅更如梳化一樣，對腳點擺都得，拉低埋中間手枕，真係好似喺屋企一樣咁舒服！雖然無電座皮椅，Move車廂卻以實用取勝，中控台、手枕、門邊處處雜物匣，啱晒銀包、手機、遊戲機、MP3通通戴晒上身嘅後生仔女。另外前座椅背設有雜物勾、後座椅背拉個掣就可以放平，加上車身高，載物量自然有番咁上下。

空氣淨化車廂最時髦
■這副銀黑色三幅軚環屬名牌Momo出品，夠型格！

■磨砂銀色中控台備有8碟CD/MD數碼音響。

■軚波好啱位，用開普通波箱嘅都好易適應。

■首次用於Move嘅離子簇空氣淨化系統掣。

■銀邊白底表板好有跑車味道。

■連體嘅前座椅好似一張大梳化，劈大腳坐都得。

■後座空間亦好大，其實坐三個人都唔會太迫狹。

隱藏式雜物匣通處有

■前座乘客位設有上下兩個獨立首飾箱。

■前座中間設有收藏式手枕，夠方便。

DaihatsuMoveCustomSpecifications

引擎：659cc直4DOHCTurbo
馬力：64ps/6000rpm
扭力：10.2kgm/3600rpm
傳動：4前速自動波，前輪驅動
懸掛：（前）麥花臣支柱（後）扭桿式
制動：（前）透氣碟（後）鼓式
輪胎：165/55R15
尺碼：3395×1475×1610mm
軸距：2390mm
車重：870kg
車輛提供：皇冠汽車（24766138）

■側開式尾門，唔使拆頭枕都可以將後排座椅放平。

其他KCar推介

大發MiraGino

大發係最積極引入KCar嘅品牌，呢部同廠嘅MiraGino性能及擁有嘅裝備都同Move差唔多，車廂及外形都好有一股懷舊感覺。
車價：$86,000

鈴木KeiWorks

四輪驅動KCar，頭尾輪皆配備碟煞、64ps/6,500rpm最大馬力及10.8kgm/3,500rpm最大扭力，性能表現佳，車廂一雙Recaro座椅亦係吸引之處。
車價：$108,000