街機版《鐵拳5》出咗唔夠半年，廠方已經宣布喺3月31日推出PS2版。過往PS2移植《鐵拳》系列表現不俗，多邊形運算及材質貼圖計得好準，往往拍得住街機版質素，而《鐵拳5》亦唔例外，聲畫表現價優異外，重加入買衫、升段位等襟玩元素㖭。
記者：徐影龍
《鐵拳》系列一向出名玩人多，今次移植到PS2除咗保留街機眾多人物及隱藏角色外，重可玩埋換衫公仔，只要努力打低對手，盡量爭取高Hit數Combo或Perfect數目，就可換取唔同嘅服裝同裝束，如Anna由旗袍轉為空姐服，重有唔同顏色嘅帽同制服畀你換，十足十女孩子玩芭比公仔咁過癮！
力爭上游為排名
女仔玩換衫，男仔機迷一樣有熱血玩法等緊你。喺街機上至受歡迎嘅「段位確認」玩法，PS2版一樣有收錄，為排高手榜頭位，需不斷接受唔同敵人嘅挑戰，相當之緊張剌激。最後一提係PS2版《鐵拳5》額外收錄各個角色嘅漫畫故事，交代下劇情同人物去向，機迷對某個角色情有獨鍾嘅話，就要勤力啲打爆機喇。