今日年初三「赤口」日，傳統習俗，每年今日為免與人有口舌之爭，人人都唔會出外拜年，又適逢賽馬日，賭馬或玩吓麻雀仔幾乎成為部份人的指定動作。想新年有番少少財氣發番個新年財的話，不妨參考以下幾個開賭運小秘笈，從而增加賭運同偏財運，再配合自己本身的運氣，話唔定可以有所斬獲！
記者：黃婉冰 攝影：林栢鈞
ImageGirl：Irene
鳴謝：天同館鐵板神數侯天同
服裝提供：生意滔
八大法寶增財運
法寶一：出門向西行廣納財氣
今日為正月初三，丙寅日，財神在正西方，如果想沾染財氣以增加賭運的話，出門口後站在街上，先向着正西方行，就算目的地並非位於你的正西方，亦應該先向着正西方行一個圈，然後再向目的地進發。
面向馬場西方度馬仔
入到馬場後，亦可面向着馬場的正西方度馬仔，這樣亦可以廣納今日的旺氣和財氣，旺者添旺，凶者減凶。另一方面，是日與猴相沖，所以但凡生肖屬猴而又生於1932、1956、1980之人，要特別小心，隨時贏十蚊變成贏得一蚊，還是忍忍手，小賭為妙！
沙田馬場財位圖
入到馬場，記得第一時間搵番個面向馬場正西方的座位（紅色陰影部份），坐喺度思考度馬纜，亦是增加旺氣的方法之一。
法寶二：今日當旺顏色
唔好以為新年流流着到紅噹噹就等於旺氣十足，其實顏色一樣有宜同忌，萬一着錯色，一樣會由旺變衰，所以着衫顏色一定要留意。今日當旺顏色是黃、白、啡色系列，最忌紅、紫、橙色系列，換句話講，若穿着黃、白、啡衣服，對增加旺氣會有所幫助，着到成身大紅大紫或橙色，反而會剋住財神而令旺氣減少，着衫時記得要多加留意喇！
法寶三：幸運騎師、練馬師
侯師傅又利用了騎師同練馬師的出生日期，推算出幾位在今日特別好運的當旺騎師及練馬師，重未有心水的話，不妨考慮一下以下幾位「LuckyGuy」！
今日幸運騎師
今日幸運練馬師
法寶四：校啱吉時落注
想旺上加旺，除以上法寶外，趁吉時落注亦可有助增加勝出機會。整體來說，今日由上午9時至下午3時、下午5時至凌晨這時段都屬於吉時，當然，並非所有人在此吉時投注都係必贏，重要配合番本身個生肖。若然本身的生肖為當旺的話，則有贏錢機會，相反若生肖屬猴而又未能在吉時落注的話，只會增加本身的霉氣！
法寶五：四個幸運號碼
有幸運馬名同騎師名，當然亦有幸運「冧把」。今日比較旺的幸運號碼有1、4、6、9號，由於以尾數計，所以11、14等號碼亦在範圍之內。所以凡有此號數的馬匹號碼，在今日都會較有運氣，再去埋以上數字嘅櫃位投注，話唔定可以贏番多少，荷包有進帳。
法寶六：「寶」字馬名最當旺
除幸運騎師外，亦可從馬名入手，但凡有個「寶」字的馬匹，在今日來說都特別旺，從這方面參詳一下亦無妨。
法寶七：同當旺生肖者拍住上
如果咁唔好彩本身屬猴而又想湊湊熱鬧的話，可以搵個生肖屬馬、狗、豬的朋友拍住賭或參考他們的意見。因為以上三者在今日來說，是十二生肖中最旺的一群，沾沾旺氣，就算唔贏都可以輸少啲。
法寶八：肖猴戴玉豬減霉氣
今日沖猴，屬猴之人唔想霉氣纏身，可以佩戴一隻玉豬在身，呢招可以有助將霉氣減少，就算輸起錢嚟都無輸得咁甘！
攻打四方城坐東向西
唔賭馬，可以搵幾個朋友打吓衞生麻雀，去朋友屋企打就話無得揀，若然請朋友返屋企開枱的話，第一時間梗係揀番個有利位置。今日財神在正西方，坐東向西就可以吸財氣，增加贏面，有機會的話，盡量叫「筒子」，而且最好叫一、四、六、九筒，食胡機會會較高。
配合出生日期最準確
俗語有云，逢賭必贏的話，呢個世界重邊度有窮人？所以千祈唔好以為出盡以上法寶就一定贏硬，甚至可以反敗為勝。鐵板神數侯天同表示，單憑一個生肖去推算，只能作為一個參數，並不代表所有人。若要真正推算一個人當日是否有運行，還要配合當事人的出生日期去推算，換句話說，就算本身屬於以上所提及過的當旺生肖之人，亦並不代表一定會贏錢，始終還要視乎當事人本身的運數如何，正所謂吉者添吉，凶者減凶，講到尾賭博除要靠運氣之餘，亦要講求實力！
雞年十二生肖財神位一覽表
