巴塞隆拿自從由拉樸達做會長之後，唔單止成績好咗，就連盤數都靚埋，喺○三至○四年球季有五百萬歐元嘅盈利。好多人話拉樸達喺巴塞嘅最大成就，就係爭贏英超聯曼聯簽咗「細哨」朗拿甸奴返嚟，令隊波可以喺球場上成功翻身，並有機會喺今屆壓過死敵皇家馬德里攞倒西甲聯錦標。之但係，佢有啲成就係球迷睇唔倒，就係搞番掂隊波嘅財政問題。
巴塞上屆表現好咗，連帶入場睇波嘅人多咗同吸引多啲贊助商，加上夏天喺亞洲賺咗筆同踢走啲高薪球員，於是埋單重有五百萬歐元落袋；而佢哋重話，喺○四至○五年球季，預計會淨賺一千三百萬歐元（約一億三千萬港元）。
足球愈嚟愈商業化，球會盤數亦同球員嘅表現掛鈎，好似德甲多蒙特因財困而不斷減球員人工，搞到班人冇心機踢，所以戰績好差。巴塞𠵱家嘅財政穩步上揚，不但有力留住班主力同簽啲好手返嚟，話唔定季尾發威攞多幾項錦標壯聲勢所謂跟紅頂白，紅就要捧，第日有機會威脅曼聯嘅首席富豪球會地位。
美國富翁格拉沙收購曼聯消息一出，有個叫「曼聯教協」嘅球迷組織搵埋幾百人，圍住奧脫福遊行示威，重邊行邊唱歌：「格拉沙快啲去死，會點死法？梗係斬開一碌碌啦！……」而曼聯警方已經介入調查。其實，曼聯有咁嘅忠心嘅球迷係一件好事，不過
睇嚟A高爾同阿仙奴都係咁先啦！據A高爾老友透露，阿仙奴喺聖誕節同A高爾傾好晒續約條件，會方應承加雙倍周薪畀佢，點知後來正式出來個數字足足少咗五千英鎊周薪。A高爾知道後㷫過辣雞，加埋傳聞車路士願意出到九萬周薪，雲格都係搵定個左後衞吧嘞！
周三英格蘭對荷蘭場波，加歷查難得有正選上陣嘅機會，點知賽後就俾佢老竇搞到好尷尬。原來，佢老竇當時喺VIP包廂房同個仔打氣，唔知係咪肉緊得滯，邊睇邊爆粗，最終俾工作人員趕咗出球場，俾人插鼻箍頸之下，佢都重唔收口繼續鬧，結果搞到俾警方拉返差館㖭。
英國傳媒日前披露，車路士油王老細阿巴莫域治，拒絕做佢祖家俄羅斯嘅足總會長；雖無詳細解釋原因，但我求大俠就認為阿油王之所以涉足球圈，都係想買間球會當玩具或者當投資咁玩啫，對於足球有幾熱誠，就好少聽到佢講嘞。做足總會長？不如買多幾隊波玩下重過癮啦。