噚日係大年初二，輪到唐唐開放佢嘅壽山村道官邸，畀傳媒上佢度拜年。唐唐就比煲呔好客啦，預備咗好多過年食品同糖水，特別係唐家秘製嘅糕點，畀山長水遠嚟到嘅記者品嘗，重同傳媒傾咗差唔多成粒鐘。煲呔喺大年初一淨係預備咗個全盒，每人再加多杯百寶茶就搞掂，半粒鐘就送客走。好客呢方面，煲呔真係唔及唐唐啦！
唐唐封利是係紅底。唔知係咪俾數碼港搞到心有餘悸，煲呔封利是得五十蚊，可能係驚封多咗，會俾人話「官記勾結、利益輸送」。
噚日朝早天朗氣清、陽光普照，着住粉紅色小背心嘅唐太郭妤淺比唐唐重搶鏡，佢又攞住部DV機，訪問番啲記者講吓新年願望，重叫八方千祈唔好錯過啲唐家自製茶葉蛋同紅棗糕，點都要食番兩件。八方試完都覺得好好食，唐太認真好手勢！
唐太同八方講，雖然唐唐要搞預算案，但佢每日都唔會好夜瞓，因為佢唔會將啲公事攞返屋企做。至於啲仔女，唐太話，最大個女都十六歲，但都唔捨得畀個女去外國讀書，希望個女可以跟住自己，讀書叻唔叻都唔緊要，好似唐唐咁，佢細個時讀書成績都唔好啦，所以唔好畀仔女太大讀書壓力。
啲電子傳媒臨走前就叫唐唐講番兩句賀年說話，但唐唐就連甩兩次嘴，第一次講就嫌講得唔夠好意頭，第二次就講錯咗，將「打工仔人人有人工加」，講成「打工仔人人有工加」，咪即係人人做到更加辛苦。到第三次先講得掂！
唐唐安排噚日初二拜年真係好時間，因為八方今日就要入馬場賀歲，如果今日先去搵唐太「妤淺」，睇怕去馬場都冇乜斬獲，「輸錢」收場啦！
（圖）記者臨走前，唐英年向記者派桔，象徵大吉大利。
傳真︰2623-9278
電郵︰