前日巴西與香港大戰，八方都有去捧場，雖然香港輸咗，但表現拼搏，值得一讚。不過今年賀歲波好似少咗啲星味，唔少名人可能出咗埠，八方經過電盈個包廂，唔見電盈副主席蘇澤光（Jack蘇，圖），但一問之下，原來佢去咗英國探女。Jack蘇同老婆真係二十四孝阿爸阿媽，老公同老婆分別喺香港同英國，一人陪住一個女，今次重趁假期一家團聚過年。
至於以往喺大球場包廂，都撞到唔少立法會議員，今次就唔多覺，八方後來喺球場撞到鄭家富同張文光兩隻波牛，佢哋話今次唔使撲飛，買飛好容易，所以自己掏荷包，同屋企人去睇波。
傳真︰2623-9278
電郵︰