今日年初三，俗稱赤口日，預料十萬人以上湧往沙田拜車公、轉風車、打鼓、求番支籤。前年癸未羊年民政局局長何志平求得下籤，香港碰上沙士，衰足大半年；去年甲申猴年，何局長唔敢再去車公廟，改由鄉議局主席劉皇發到車公廟求籤，佢叫做求到一支中籤，實為下籤，籤文講中晒特區政府施政之困難，卒之俾胡主席當面教訓：「查找不足」。籤文最後一句：「囊空不見舊同袍」，○四年就有楊永強局長、林煥光主任、醫管局主席梁智鴻掛冠而去。
今年又如何？政府官員、鄉議局每年在車公誕正日（年初二）拜車公，今朝應有籤文見報。不過因為新年交稿，左丁山暫時未知，第日再做解籤佬。一般市民今日先去車公廟，九至一時、下午三時後，算係好時辰，信車公者宜注意。
左丁山年年拜車公，但因為年初三太多人，唔鍾意去擠迫到冇氣唞，所以要揀日子，周末吉日就最啱，一睇通勝，耐咯，要到二月二十七日星期日先至係周末吉日，冇法啦，惟有等到月尾，因為平時要返工，冇時間去。點知秘書深知我心，查埋賽馬日曆，唉也，嗰日跑沙田日馬，有百周年短途錦標賽，可能「精英大師」又試出嚟派息畀馬迷，唔去唔得噃！再睇真啲通勝，好彩當日上午係吉時，還可以諗吓。
拜神求籤之事，信則有，不信則無，宜以開放態度視之，唔好批評別人迷信，亦唔好鬧人唔信。統計學上來講，幾十年來每年有咁多人去拜黃大仙、拜車公、求籤，如果冇若干理由，點解咁多人去呀？搞民俗學嘅學者學生，最好以此為研究題目。