現年二十四歲嘅日本純情女星田中麗奈，被噚日出版嘅日本雜誌《FRIDAY》偷拍到佢同日本樂隊L’Arc~en~Ciel結他手Ken拍拖行街，重話佢哋已經拍拖半年兼同居。
據《FRIDAY》報道，喺今個月五號，戴上眼鏡嘅麗奈被拍得同Ken到東京世田谷一間超級市場拍拖買餸。當日，童心未泯嘅麗奈企喺賣零食嘅貨架前，不斷咁揀迪士尼公仔糖，而等得唔耐煩嘅Ken就催促麗奈快啲，不過麗奈一於少理，點都唔肯走。
而喺上月尾深夜時分，Ken同麗奈亦被發現喺Ken屋企附近嘅一間燒肉店度消夜，其間兩人有講有笑。大約一個鐘頭後，Ken就揸車載麗奈返去自己嘅豪宅。之後幾日，記者亦曾多次目擊麗奈放工後往Ken嘅屋企，相信佢哋已經同居。
據知兩人喺六年前由朋友介紹認識，呢半年先開始拍拖。三十六歲嘅Ken結過兩次婚，亦曾有報道話佢虐打大肚老婆，反觀形象清純嘅麗奈，過去只被偷拍到同一名圈外男子拍拖。麗奈所屬事務所就話佢已經大個女，唔會干涉佢嘅私生活喎。