新一年開始，邊個人唔想行大運？有運行，行到天腳底都制！堪輿學家吳佩孚推介行大運路線，九龍入西貢接八白吉星，入泥涌放完紙鳶再出沙田市中心兜個靚圈，就可以一年到晚健康大利，桃花正財橫財跟住你。行大運路線全程搭車多過行路，無藉口懶嘞啩？趁住今日初二開年，不妨跟住兩位模特兒走一轉，行個大運，開個靚年！
記者：張一豪
攝影：蔡鴻雯、張一豪
模特兒：Hilda、Lela
第一站：蠔涌車公廟風車轉運
難得有幾日連假，不如到郊外吸吸新鮮空氣，行大運第一站就到西貢450年歷史的蠔涌村拜車公。相傳車公是宋末大元帥，隨帝昺南下駐守西貢，精通醫理妙手回春，死後村民感其恩，建廟供奉他祖孫三代；至清朝，沙田發生瘟疫，遂欲請車公出師驅瘟，蠔涌父老認為車公必須坐鎮蠔涌，只肯讓沙田村民帶走車公孫兒神牌，神牌靈驗，沙田各村瘟疫消失，爺爺勁過孫，計落蠔涌車公廟應該比沙田車公廟更靈驗啩？唔轉番轉風車就係對唔住自己。
不說不知，原來今日才是正式車公誕，只因初三赤口不宜拜年，故善男信女才一窩蜂在初三拜車公，今日拜車公究竟有何步驟？Hilda問得好：「我近來好好運喎，人人都讚我靚女，男朋友又錫我，再轉風車會唔會行衰運㗎？」廟祝解釋：「轉風車男左女右，記住順時針方向轉，咁就可以轉走衰運，本身好運嘅話亦只會愈轉愈好，之後打埋鑼鼓，保佑你身體健康。」Lela即打鑼鼓：「呢輪有兩聲咳，睇吓可唔以化啖止咳。」話時話，之後整個行程未聽過伊人咳一聲，咁靈？
第二站：自然教育中心認識大自然
第二站獅子會自然教育中心，今日年初二照常開放。入內，Hilda與Lela先被怪石陣吸引，忙上前留影，旁邊有幾棵樹木，高矮不一無花無果，以為無甚特別，細看原來是不同品種的果樹，刻下深冬所以無果；吸口新鮮空氣再走，終於見到棵結滿結果實的矮樹，纍纍橙黃，原來是柑桔，Hilda大呼：「恭喜恭喜，搵到棵桔樹，果然行來行去得個桔！」應節，又應景。除開放式農場外，自然教育中心尚有多個展覽館，當中以貝殼館最值參觀，一家大細趁今日行下，既心曠神怡，又可對大自然多加認識，一舉幾得。
獅子會自然教育中心（27922234）
地址：西貢蕉坑
開放時間：9:30am至4:30pm
第三站：蕉坑自然教育徑遠眺西貢海
獅子會自然教育中心隔鄰就有條蕉坑自然教育徑，一路上花草茂密，沿途有路標指示方向，兼有傳意牌解說植物種類和生態，帶小朋友去，一定吸收不少自然界知識。Hilda與Lela少接觸綠色植物，愈走愈好奇，Lela道：「一碌杉就聽得多，今日第一次見，先知杉樹係常綠喬木，兼係防蟲蛀木材，唔知杉樹頂唔頂得住紅火蟻呢？」Hilda看罷傳意牌，即鬆開手上的木臘樹，因捉摸木臘樹會引起皮膚敏感，幸好摸完依舊皮光肉滑。
欲窮千里目，更上一層樓，西貢背山靠水，高崗俯覽氣勢一絕，教育徑最高處有祿善亭，亭內吹風納涼一流，兼能遠眺西貢海和白沙灣的景色，青山綠水空氣清新，果然龍馬精神。
第四站：泥涌摸蜆水為財
行完教育徑，乘巴士往第四站泥涌。泥涌是個小石灘，下午四時開始潮漲，潮退時露出的灘面部份很多，貝殼被沖水岸、沙蜆潛藏泥中，故經常有人在此拾貝殼、摸蜆打發時間。泥涌近海，風大，每逢假日都有不少遊人來放紙鳶，管你新手高手，年初二到此放紙鳶，一定要成功起鳶至好走，攞番個步步高陞的意頭都好嘛！
第五站：西沙吃應節泰國菜
玩到攰，肚仔餓，不妨考慮到泥涌旁邊的西沙茶座、彩軒、漁米之家等幾家露天茶座歎番個美味下午茶。筆者推介彩軒，因它推出的幾款過年應節泰國菜勁好意頭，啱晒今日過年氣氛，味道方面不算太辣，滿足到一家大細口味，食飽飽然後乘車出沙田市中心，完成一日行大運之旅，出到市區重有大把時間畀你約班Friend睇煙花。
彩軒（26429788）
地址：西貢北西沙路十四鄉泥涌10號E-F
營業時間：12:00nn至11:00pm
入西貢接八白吉星
根據堪輿學家吳佩孚說：「今年八運起自東北方的八白吉星，所以從九龍入東北的西貢接吉星，再由西沙離開到沙田，就有迎春接福行大運的意思，行過大運嘅人，雞年財運、人緣運同健康運都會向好處發展，有助整體運勢。」正所謂一年之計在於春，兜個靚圈就有運行，重唔拿拿臨出發？
交通行程
1.蠔涌車公廟：彩虹地鐵站乘1A專線小巴（$7.5）至蠔涌村下車。
2.獅子會自然教育中心及蕉坑自然教育徑：蠔涌村折返西貢公路，乘1A專線小巴至蕉坑下車。
3.泥涌及西沙茶座：蕉坑折返西貢公路，乘1A專線小巴至西貢中心，轉乘299號巴士（$9）至泥涌下車。
4.沙田市中心：泥涌乘299號巴士返回沙田市中心。
