今年市道好咗，好多人封利是都會封大封啲，不過民主黨黃成智封利是就被迫要縮皮，因為落咗車冇得做立法會議員。黃成智話，𠵱家收入唔穩定，佢屋企分分鐘都可以叫做「低收入家庭」，所以利是都要封番細封啲，就連個手提電話，都要返大陸買國貨TCL。
不過重返立法會嘅李永達，就冇因為每個月多咗五餅嘢人工就封多咗利是。達仔話，每年都係預幾千蚊封利是，估計今年都差唔多，因為封利是呢家嘢主要都係太太陳樹英負責，實數係幾多就要問佢啦！
至於一直留喺立法會嘅肥仔明同達仔一樣，利是錢冇乜變。肥仔明話，雖然經濟好咗，但議員份人工年年都一樣，同外面經濟環境冇乜關係，所以利是錢就唔會加碼啦！
傳真︰2623-9278
電郵︰