每年新正頭都係拜車公嘅大日子，有關拜神攻略、注意事項嘅報道年年都有，拜車公除咗要誠心外，最好當然係可以揀啱時辰再依最正確最傳統步驟進行，今年搵嚟車公第18代後人車品覺先生講拜車公攻略，夠晒說服力啩！
記者：馬慶武 攝影：林栢鈞
Model：Dion、Katie（DragonEight）
沙田蠔涌各有車公誕
香港有兩間車公廟，準備拜車公之前第一件事就係要決定去向。車公後人車品覺就話其實兩間廟宇供奉嘅車公完全唔同，濠涌車公廟有400年歷史，內裏供奉嘅車公係最先祖。約200年前沙田發生瘟疫，居民聽到拜車公可治瘟疫嘅傳聞後，就到濠涌希望請車公像到沙田，不過因為濠涌居民不允，最後只請到車公孫兒嘅神主牌到沙田，所以兩邊供奉嘅車公係完全唔同。沙田車公誕喺大年初三，而濠涌車公誕則同車品覺鄉下一樣係農曆三月初三，所以正式嚟講，年初三應該往沙田拜車公。
唔一定要凌晨上香
據車先生講，今年往沙田車公廟拜車公嘅最佳時辰係初三凌晨子時（據車品覺講係踏入初三嘅零時12點，而非11點），即上頭炷香嘅時間。不過初三赤口基本上任何時辰都適合拜車公，除踏正子時外，子時至寅時時段（凌晨3點至5點）都係較好嘅時辰。
風車只須轉一次
車品覺接受訪問時強調，拜車公最重要係誠心，佢所講嘅步驟只係依其鄉下「綠村」（廣東與廣西間茂名附近）習俗。
「一入車公廟，就先要擊鼓，目的係話畀車公知你到咗，之後可以順序到主廟外、內祈福上香，上香後再擊鼓，之後就可以化寶（如車公衣、元寶等）、轉風車、求籤，最後再拜一次車公象就可以離開。」
車先生重話轉風車只需轉一次，與民間流傳需要轉三次有所出入。另外沙田車公廟亦不設化寶盤，善信只可以將車公衣等放進廟內「化寶車」，待廟宇職員代為化寶。
拜車公 9部曲 要做足
1.入廟
初二晚至初三係往沙田拜車公嘅最佳日子，參拜者眾，車公廟為控制人流會以側門為入口
2.買車公衣
廟內可以買到車公衣、香燭，種類好多，亦有包括大、中、線香嘅套裝。
3.揀風車
風車有大有細，有平有貴，價錢由$20至$268都有。Katie就話一定要買最大嗰個番屋企，行番個雞年大運嘛！
4.打鼓
入廟後及離開前都應該打鼓三下，「通知」車公。
5.上香祈福
先在主廟外點香、上香，較大嘅香燭應該上喺廟前嘅香爐。之後再到主廟內誠心向車公像祈福，再上三炷線香。離開主廟前再打鼓。
6.化寶
沙田車公廟唔可以親自化寶，只好將車公衣、元寶等放到「聚寶車」。
7.轉風車
除非你上年運勢極差，否則轉銅風車時應該以順時針方向轉動，並應該等待風車自然停定後才好離開。
8.求籤
拜車公不一定要求籤。如果想求籤問卜，應先借用籤筒，再進主廟內誠心下跪，留意每問一件事都要獨立求一支籤。
9.解籤
之後再到解籤處攞籤紙。唔識解嘅話，就要勞煩解籤處嘅師傅喇！（籤紙每張$5，解籤每張$10）
探車公 有避忌：除帽入廟
1.如果善信帶孝在身，即有家人去世後不足100日，便不應前往車公廟參拜祭祀。
2.要尊重神明，尤其入廟後更應注意言行，例如唔好粗言穢語，最好不要佩戴帽子及戴太陽眼鏡。
5.廟內兩邊二樓分別有鐘樓（左）及鼓樓，𠵱家已經唔再開放畀公眾，唔好亂咁行上去呀！
拜車公知多啲：求財最「靈」
1.拜祭車公只會用豬肉，即燒豬甚至豬頭，不要用齋菜。車先生話無解釋，只係祖先留傳落嚟嘅習俗。
2.參拜者只要清心毋須清身，即毋須齋戒沐浴，參拜時只要保持清淨嘅心景便可以。
3.求財運者，或從事勞動行業者拜車公尤其靈驗。
4.據車先生講拜車公同善信所屬生肖、着咩色衫拜或者喺邊個方位拜祭都無關係。
車品覺——車公第18代傳人
筆名車詠民，三十多歲，車公第18代後人，到少年時代查看族譜才知道自己係車公後人。現職電腦行業，家傳風水，為興趣而習斗數、西洋星象，亦有為報紙、雜誌撰寫有關玄學嘅專欄。
車公為南宋忠勇武將
據車品覺講，車公係南宋時期嘅武將，屬大元帥，本姓田，後獲皇帝賜姓車，後人為表揚他忠勇衞國而奉之為神。最後喺廣東與廣西間嘅「綠村」定居，第一代後人共有四位。對風水、紫微斗數、醫藥皆有深厚認識，所以後人流傳拜車公可以治瘟疫。
沙田車公廟
地址：沙田車公廟道3號
開放時間：年初二晚11:00pm-年初三5:30pm，年初四至初十九：7:00am-5:30pm（正常開放時間為7:00am-6:00pm）
交通：可於大圍火車站出，沿「車公廟」指示前往，步行約15分鐘可達。
蠔涌車公廟
地址：蠔涌蠔涌村
開放時間：年初二11:00pm至年初三6:00pm（正常開放時間為7:00am-6:00pm）
交通：可於彩虹地鐵站乘1A（往西貢）專線小巴，於蠔涌路口巴士站落車，沿入濠涌村方向步行3分鐘可達。
