今日大年初二,恭祝各位身體健康、步步高陞,但相信對於香港人來說,都係恭喜發財最為啱聽。有運發財自然係好事,但如何加強財運當中大有學問,今日新正頭就同各位分享點樣可以增強財運,特別邀請了著名玄學家麥玲玲師傅,從玄學、風水角度出發來增強財運,等大家於雞年行運到狗年!
記者:李崗華
攝影:陳智良、伍慶泉
模特兒:豪、Yonnie@D8
雞年屬火行業當旺
新一年有想過自立門戶做生意?抑或想轉行?咁就要留意以下麥師傅推介的雞年當旺行業,大家可以從中作參考:「今年八白財星飛臨離宮,離宮屬火,所以今年屬火的行業特別與旺,當中包括電子、電訊、珠寶、首飾,燈飾及石油行業。其次係一白桃花星飛臨的坎宮,坎宮屬水所以屬水的行業走勢亦佳,包括旅遊、酒店運輸、金融股票、飲食及運動等。」
當旺顏色:「紅」過雞年!
新年着衫首選當然係紅色,但原來據麥師傅講由於今年大利南北方,所以今個雞年紅色會大為當旺,更不單止着紅衫會增強運勢,而且售賣紅色的產品更會特別好賣。除紅色外,淺藍色亦會有同樣的效果,但就要留意,由於雞年不利東方,所以就盡量避免着綠色衣物,而駕駛綠色汽車的車主亦要加倍留意,因為會較易發生意外。
正南催財吉位!
玄學中的地運及飛星力量,就係關於今年大利哪一個方向的重要元素,地運會每二十年轉一次,由上年(由2004年至2024年)開始經已踏入八運,當中的八白星更成為九星中力量最強的吉星,所以於今年如果想催財,就要留意八白星所在位置──正南方向。而正南屬火及土,所以紅、黃二色的物件會有催財之用,屬火的物件例如有揮春、大型家具、窗簾及地氈等,而屬土的物件有白色陶瓷等,不妨多放於家中正南方位。
簡易家居發財風水陣
前文介紹完催財,如果想進一步於家中擺放風水陣,麥師傅推薦「九宮飛星」陣畀各位,此陣不單止有催財的功效,更有催桃花、利升職、化大病等多種功效,而且方法簡單,材料簡單,絕對可以說是一個D.I.Y多用途風水陣,要擺當然以擺齊全個陣效果最好。
雞年發財數字!
香港人熱愛六合彩、賽馬活動,而呢兩個活動都係同數字有關,麥師傅認為今年南北方向會大旺,所以推介了兩個於雞年比較旺的數字:9及1畀大家,等大家於買六合彩或馬時可作參考。
雞年催財必戴黃晶、兔仔飾物!
除可於家中擺放「九宮飛星」陣來增加財運外,更可於自已身上催財,只要佩戴黃晶及兔仔飾物便有助可增加財運。
麥玲玲師傅
麥師傅自幼跟隨名師學習術數,對手相面相紫微斗數、子平八字等術數均甚有研究,尤其精於推算感情事宜,為香港少有的女性著名風玄學家。