經常工作纏身的任賢齊，今年終於能返台灣過農曆新年。小齊表示新年愛一家人在家包餃子，並把一枚硬幣放在其中一個餃子裏，誰人吃到「有餡」餃子，便會好運來。
今日是大年初二，最近忙於宣傳電影《韓城攻略》的任賢齊，終於能偷閒返台灣休息數天。為了應節，他日前更親自下廚炒年糕，寓意今年步步高陞，看他弄得似模似樣，似乎平日有煮幾味。
小齊表示新年一家人會在家中包餃子，並將一枚硬幣放在其中一個餃子裏，看誰吃到「有餡」餃子，便會幸運隨身，他說：「不過近年都好少自己包啦，冇時間嘛，多數都係買返嚟之後再塞個硬幣落去，我阿媽重會喺年三十晚買條魚返嚟，擺幾日都唔准食，代表年年有餘，不過細個嘅時候成日都偷食。」
談到新年願望，小齊希望能多點與家人相聚，他說：「我覺得我太少時間陪佢哋，我怕有日失去之後會後悔。」
另外，小齊跟梁朝偉合演的電影《韓城攻略》正在上映，雖然他並非首次參演賀歲片，但今次卻感到壓力，他日前說：「可能係周星馳嘅《功夫》非常成功，怕會有比較，而且又係梁朝偉推薦我拍呢套戲，所以特別緊張。」
小齊表示自從拍畢《大事件》後，令他開闢了做大反派的戲路，他說：「偉仔都係睇完我嘅《大事件》，覺得我做得幾好，先推薦我。咁我覺得都唔錯呀，做演員係應該可以做唔同嘅角色。」
採訪：胡比 攝影：林德雄
場地提供：夜上海 服裝：i.t
化妝：AngelYip
