踏入雞年，八方都希望香港社會可以和諧啲，所謂家和萬事興，但係問題係老共唔係咁睇，一覺得香港失控唔聽話，就不惜出手干預，呢個真係信任問題，其實香港人點會作反呢？最多都係雞咁腳啫。
好似個立法會，惡都惡唔得出樣，最多係意見多多啫，北京使乜咁驚？八方趁過年，睇吓班議員邊個犯太歲，發覺議事堂內真係零舍多雞年出生嘅議員，唔怪得成日雞啄唔斷。
依年份計，一九四五年同一九五七年出生者屬雞（唔計年頭年尾住），立會六十位議員，一共有八隻雞，都算多啦。今年足六十歲嘅有主席范太、身兼行會成員嘅周梁、紡織名人梁劉柔芬以及石禮謙。至於滿四十八歲嘅就有李卓人、張超雄、譚香文同埋劉江華，真係八雞爭鳴。
八方問職工盟秘書長李卓人，怕唔怕犯太歲？佢話，從來唔信犯太歲呢啲嘢，所以百無禁忌，唔會趨吉避凶，佢重講笑話，上星期已經喺尼泊爾遇上政府同游擊隊內戰「呢鑊嘢」，相信今年唔會有乜大問題啦。
阿人都好識得自己讚自己，話其實做屬雞嘅男人都幾好，雞能文能武，又有仁有勇有信，就算有乜問題，一定可以化險為夷。嗱，屬雞嘅男士要聽啦。
至於張超雄教授，更加話自己唔識乜嘢叫做犯太歲，真係高人。問佢會唔會同長毛搞到個立會雞犬不寧，佢話梗係冇咁厲害，不過，周一嶽局長就等住雞年接招，因為呢位有「社福界長毛」之稱嘅張教授話，一定要政府全面改革一筆過撥款嘅政策，佢又希望重振社工嘅精神，做好扶貧工作。
至於立會主席犯太歲，唔知有乜方法避一避，張超雄就話，佢同范太相處得唔錯，至於雞年，佢就希望港人精神爽利，好似金雞獨立咁，雄赳赳地，抬起頭嚟做人。
傳真︰2623-9278
電郵︰