粉墨登場救助無家小動物
傅明憲五福狗狗賀有心人

傅明憲去年底成為香港愛護動物協會會長，早前她的五隻至愛北京狗更粉墨登場拍照，成為慈善利是封的主角。傅明憲呼籲有能力的善心人到該會領養動物，於歡樂的新年給牠們溫暖的家。

傅明憲是愛狗之人，五年前已成為香港愛護動物協會愛心大使，去年十二月她更成為該會的會長。為慶賀農曆新年，傅明憲早前率領五隻至愛的北京狗，包括狗醫生「綠茶小姐」及「比目魚先生」，「饅頭」、「孟波」和「西蘭花小姐」，穿上應節賀年服飾拍照製成慈善利是封。

呼籲領養動物
印有「五福臨門，久久好運」祝福語的利是封，既熱鬧又好意頭，二十個只售五十元，傅明憲更與「綠茶小姐」名義贊助利是封的製作費，實行一家大細身體力行做善事。傅明憲日前說：「我真係一屋老狗，有呢個慈善利是封係因為我覺得佢哋有我錫，加上佢哋已經皈依，經過寧波車『加持』及『灌頂』，好有福氣，所以想將佢哋嘅福氣畀啲有愛心的人。」
五隻愛犬中，傅明憲特別欣賞最年長的十四歲「綠茶小姐」，她說：「因為佢有癌症，加上對眼已經盲咗，佢係抗癌勇士，求生意志好強，不斷試緊新藥，希望佢可以為其他有病嘅狗仔帶嚟新希望。」

給愛犬壓歲「骨」
傅明憲除了將五隻愛犬的福氣傳給善心人，她更呼籲有能力的人到愛護動物協會領養動物，她說：「農曆新年係一家團聚嘅好日子，希望可以有多啲有能力而又想養寵物嘅愛心主人可以領養佢哋返屋企，畀佢哋有個溫暖嘅家。如果冇能力，都可以將利是錢捐畀我哋個會，實行有錢出錢，有力出力。」
此外，傅明憲透露農曆新年的活動都是與狗狗有關，她會與一班愛狗的親朋好友團拜，她說：「我會入啲狗餅、骨頭落利是封派畀朋友嘅狗，有一年嘅年初二，我喺廚房入『利是』俾老公笑我點解入啲骨頭。而我五隻狗仔，就會喺除夕畀利是佢哋做壓歲錢。」
採訪：RitaLeung
攝影：MatthewLam
鳴謝：香港愛護動物協會