本欄是勞工處與《蘋果日報》合辦，逢星期四刊出，旨在為勞資雙方解釋有關僱傭問題，如有任何疑問，可致電勞工處熱線：27171771查詢，此熱線會由「1823政府熱線」職員接聽。
華仔：恭喜發財！利是𢭃來！祝你雞年心想事成，財源滾滾來！
阿富：好啦，咁好口，利利是是啦。我都祝你早日成家立室，步步高陞。係呢，你返咗工三個幾月，覺得點呀？
華仔：好好啊！多謝你教咗我好多嘢，承你貴言，希望真係有得升職加人工啦。係呢，公司上個月出通告話農曆新年放到初七，除咗初一至初三係法定假同有一日係禮拜日之外，其餘當年假。我做得三個幾月，唔知有冇得放呢？
阿富：你第一年有七日年假，做咗三個幾月，按比例計落都有兩日年假嘅。
華仔：咁咪唔夠放到初七囉！我使唔使早一日返工呀？初七係人日……
阿富：如果放埋假係咪重開心呢？
華仔：咁着數？如果唔使返工但係要扣人工，我就寧願返工啦。
阿富：係咁嘅，老闆年年都喺農曆新年特別安排全公司休息，初八先開工，順便畀同事放埋年假，呢種叫做年假歇業。
法例講明，如果僱員喺公司暫時歇業時，未足資格放年假，但係因為公司暫時休息而需要停工，咁個僱員亦都可以在公司歇業期間照放年假兼有人工。你雖然得兩日年假，但成間公司都休息，你梗係唔使返工啦，重有人工㖭，有你着數啦。
華仔：點解你識咁多勞工例嘅？
阿富：其實睇吓勞工處出個本《僱傭條例簡明指南》就一清二楚啦。
以上資料只用作說明《僱傭條例》下的相關條文，對有關法例的詮釋，應以《僱傭條例》原文為依據。如有任何爭議，則以法院的判決為最後依歸。
服務熱線
電話：29908288
傳真：23702192
電郵：