巴西隊大年初一嚟香港賀歲，論軍紀就真係比前年皇馬暑假嚟香港表演賽時好好多，巴西球員除咗操練，其餘時間都乖乖留喺酒店，冇皇馬班球星咁，又蒲吧又落club，夜夜笙歌咁款；不過我求大俠就「八」到，香港賽會為咗怕悶親呢班森巴巨星，就預備咗六部Xbox遊戲機畀佢哋解悶，據聞卡路士唔只射罰球叻，打機都好掂，喺呢個巴西足球game友誼賽中大熱勝出。
雖然球員冇得行街街，教練就冇咁嚴，老教頭薩加奴到埗第一日就買攝錄機外，教練彭利拿前日就由賽會職員帶路，去到旺角狂掃數碼產品，重一口氣買入六部手提電腦，十幾部iPodMP3機，計計埋埋都洗咗差唔多六位數字，咁大手筆，都算刺激香港經濟咯。
車路士日前宣布首席隊醫費沙以健康為理由辭職，但英國傳媒就有另一版本，話原來領隊摩連奴近日同費沙喺班球員面前大吵一場，後者頂唔順至劈炮。雖然冇話兩個大男人為咩事嗌交，但睇怕都同洛賓要長唞有關。車路士啱啱失分，又受傷兵同人事困擾，摩連奴頭痕啦。
紐卡素嚟緊個幾禮拜冇比賽，大軍趁幾日假期飛去杜拜集訓兼叉電，可能因為以前紐卡素球員外遊周不時生事，所以領隊桑拿士竟然安排大軍入住當地一間警察學堂。話說間學堂附近就係世界聞名、外觀似帆船嗰間七星級酒店。雖然近在咫尺，紐卡素球員想歎世界就得個恨字。
熱刺已宣布今季球季結束後會先去毛里裘斯，然後到七月再去南韓參加一項由八隊角逐嘅盃賽，作為季前熱身兼增加球會嘅名聲。有位不願透露名字嘅熱刺球員已有微言，話陣中唔少人都認為季前咁大陣仗同操勞係盞搞。又係嘅，英超冇歇冬，呢個安排簡直連歇暑都冇埋。
曼聯下個禮拜六喺足總盃作客愛華頓，喺愛華頓球迷心目中嘅「叛將」朗尼首次回歸，葛迪遜公園保安為此大為緊張，最怕球迷搞事。梗係啦，原來今季愛華頓已經試過三場被「踩場」，俾球迷入到球場草地，再犯就可能面臨被罰聯賽扣分，隨時因此冇得踢歐冠盃，唔緊張就假。