今晚煙花滙演有咁強陣容，當然要搵定好位，擔定櫈仔啦！首數嘅好位，一定係尖東海濱嘅星光大道，同灣仔嘅金紫荊廣場，事關呢兩處係全港獨家，有埋現場配樂收聽嘅地方，氣氛當然係好很多啦！如果唔想同人逼，搵其他好位者，建議帶定收音機，因為當晚RTHK4（FM97.6-98.7）都會有現場配樂直播，等大家更好氣氛。
至正推介1：尖東海旁
睇煙花，好多人話維港兩岸都冇問題，其實此言差矣！尖東海旁是全港唯一最正景點，前有大大朵煙花，後有裝有賀年燈飾的高樓大廈，燈飾夾煙花係最正之處。
不過地點方面，想有較前的位置，一定要在下午4至5時去霸位，6點後去，隨時變為前景「人頭」，後景煙花。另外，大家亦唔好心存希望，會在附近找到有「制高點」的酒店或酒樓，記者在截稿前，附近的食肆的訂枱已經達9成以上；如果想碰運氣，有車人士可以選取海港城的露天停車場，不過都係6時前為佳，此外，在廣東道28號的力寶太陽廣場，亦有一個公眾停車場，「制高點」有8樓，亦是有車人士的不錯選擇，不過觀賞角度就冇咁開揚，是最後的選擇。
至正推介2：星光大道
如前文所述，星光大道有埋配樂，加埋同海岸線成0距離，相信是最好位置！但大家唔好諗住大把地方可以遲啲去！事關為迎春節關係，星光大道現在密麻麻掛滿了大紅燈籠，如果想拍照留念者一定要企最前排先得，中後排者一定會被這些燈籠破壞了煙花相的構圖。
至正推介3：金紫荊廣場
亦係一個有配樂的好地點，雖然背景是九龍半島，燈飾會略遜一籌，但如影相叻者，亦可以用會展新翼入鏡作構圖，都可以有唔錯效果。
至正推介4：山頂
上山頂影煙花，絕對唔係人人可以，簡單講係D-SLR機玩家的專利，事關最起碼的火力要有200mm的鏡頭（換上D-SLR機約變為300mm），鏡頭所及，大約可以做到50%煙花，加50%九龍半島夜景，構圖都相當唔錯。
