民主黨過去一年嘅黨運麻麻哋，不幸中之大幸就係，共產黨喺新年前放何偉途返香港，何偉途又肯退出民主黨，算係喺過年前引爆咗個炸彈，黨主席李永達都可以稍為安樂啲過年。
達仔話，佢新年嘅願望係，香港人個個健康啦；打工仔就有工開、有人工加；工商界百業興旺啦！佢同八方講，今年新年都冇乜特別嘢做，都係去拜吓年、食吓飯、同太太朋友行吓山、休息吓。
較為特別嘅活動係，達仔噚日選擇約埋佢哋港大七九年畢業、搞學生會嘅同學一齊聚舊，度過今年嘅年三十晚。
民主黨就整咗張電子賀卡畀市民，祝願市民「人人有工開、普選盡快來」。不過要達成其中一個願望都好困難啦，特別係全面普選，真係唔知要等到何時何日，不過，希望在人間，要民主，就要去爭取。
傳真︰2623-9278
電郵︰