成日話「留低係需要勇氣」嘅特首董建華，終於都唔肯留低，由今日開始請四日假。老董唔喺度，就由煲呔同唐唐輪流做特首（煲呔初三開始放假，剩番兩日畀唐唐做），睇住特區政府個檔。
唐唐真係唔話得，噚日年三十都好勤力，上電台解釋財政預算案，過年好多官都放晒大假，唐唐堅持唔出埠，留喺香港寫預算案。今個財政年度香港經濟咁好，睇怕唐唐唔單止可以超標提早完成滅赤，分分鐘重可以幫香港賺多幾十億返嚟，呢個都算係唐唐嘅政績，肯定送佢一程有助跑馬仔。
新一個預算案睇怕冇咁難寫，相信令唐唐最頭痕，就係點樣面對啲團體同政黨嘅壓力，要政府派大封啲利是。唐唐就同大家講，記住政府重欠人二百幾億，「出嚟行，遲早都要還」，大家唔好淨係記得派利是，唔記得要還錢！
傳真︰2623-9278
電郵︰