香港年宵市場其中一個特色，就係有好多大學生趁機學做生意，好似喺維園年宵市場擺檔嘅「發雞One」，檔主就係港大學生。
大學生風華正茂，總係不平則鳴，佢哋向八方投訴斜對面民建聯嘅年宵攤檔，違規使用大聲公，搞到鬼咁嘈，影響附近商戶嘅生意。檔主之一嘅劉同學話，簽約時明明話唔用得大聲公，佢都有同食環署嘅職員投訴過，不過冇用。
八方向食環署了解過，佢哋話，唔單止民建聯，截至前日為止，署方已經發咗九十三個口頭警告，至於警告信，就發咗四封，如果啲攤檔重係屢勸不改，食環署會即時中止合約，又可能將違規嘅檔主列入黑名單。
八方搵過民建聯港島區支部主席孫啓昌，同埋宣傳及公關委員會主席彭長緯，但兩個人一直冇覆機，反而代表進出口界嘅民建聯立法會議員黃定光覆咗，佢唔知頭唔知尾，問都無謂，於是問佢有乜新年願望，佢話希望大家身體健康，心想事成喎。
傳真︰2623-9278
電郵︰