年三十晚，潛水一輪嘅阿董，突然蒲頭四處拜年，又係滿嘴陳腔濫調，重複北京主人嘅口令，即是「團結」、「和諧」、「大力發展經濟」等等。
做特首做到老董咁，七年咯，做到全無自我，講嘢就似部錄音機，播放晒啲共黨八股，呢頭佢又赤膊上陣，做埋啲「文化創意產業諮詢委員會」主席，講嘅說話，偏偏就毫無創意，悶死人冇命賠嗰隻，香港由呢亭人胡混足七年，都咪話唔係世界奇迹！
話老董講嘢冇新意咩，咁又唔啱得晒喎！佢年三十晚話，香港目前咁嘅「盛況」，係由香港人自己努力爭取得番嚟，個大環境瞬息萬變，因此要和氣生財、前景無限咁話！呢次係佢竟然第一次冇提到甚麼「背靠祖國」、「有祖國同廣東省嘅大力支持，香港係一定得嘅」等等廢話，反為強調係香港人自己艱辛爭取！咁唔通佢終於發現，大陸唔係咁可靠，定係佢對「祖國」，經已出現抵制及抗拒？
今年係胡溫正式揸莊嘅第一個農曆新年，照道理老董應該大力強調「祖國因素」，同新發彩嘅胡溫賀一賀，例如「祝各位雞年好景，錦濤萬里」，或「家有一寶，老少平安」等等，點知一句都冇，重刻意強調港人乜乜，港人物物。喺咁嘅日子，係咪對我哋胡溫唔係幾畀面呢？
加埋人哋勒令佢「以民為本」，反官商、杜輸送，呢樣嘢照計係雞年佢董某人嘅頭等任務！老董以「查找不足，添煩添亂」嘅待罪之身，年三十晚貢出嚟學人拜年，已經唔輪到佢呼籲香港人要點要點，而係香港人嚴正要求，佢在雞年究竟點樣檢討查找、懺悔認錯，喺呢方面，老董一句都冇交功課，反為又將責任推畀香港人，話港人唔夠團結、欠缺和諧，由於對佢同佢嘅團夥，毫不和氣，所以冇得生財，真係顛倒黑白。
唔怪得又傳胡溫提早廢董（呢個「廢」字係動詞），畀煲呔攝位，捱到○六年底再選過！睇嚟有少少似喎！雞年唔知係咪殺雞儆猴之年呢？咦，煲呔啱啱行年六十，唔通佢就屬正馬騮？
（圖）老董（前排左）噚日下晝同太太（前排左二）去咗維園行花市，買花又買公仔，滿載而歸。
傳真︰2623-9278
電郵︰