巴西國家隊在今日舉行的賀歲盃中將大鬥港隊，黃泆潼和陳霽平一早撲飛捧場，以示支持，她們日前更與陳穎妍一起穿上巴西球衣為喜愛的球星打氣，果然是瘋狂球迷！
巴西國家足球隊今日大年初一在香港大球場與香港隊踢賀歲盃較量，來港的知名球星包括世界足球先生朗拿甸奴和卡路士，雖然效力皇家馬德里的朗拿度未有來港，但相信仍吸引不少球迷往捧場。
而無綫小花黃泆潼、陳霽平和陳穎妍原來都是足球迷，日前三人齊齊穿上巴西球衣展現球技，以示支持巴西隊來港作賽，雖然她們的球技認真麻麻，幸以一股熱誠搭夠。
陳霽平和黃泆潼透露一早訂了入場券與三五知己欣賞賀歲盃，問她們最喜歡哪一位球星？她們同聲表示鍾情哨牙仔朗拿度和朗拿甸奴，反而對靚仔的碧咸不太在意，陳霽平說：「靚仔個個都鍾意，但個個都鍾意碧咸好悶，朗拿度雖然唔靚仔，吸引女仔嘅地方係夠cute。」
黃泆潼則自言經常觀看足球賽，她說：「巴西隊係踢南美波，腳法同球技一般都勁啲，我當然都係捧朗拿度場啦，佢腳法咁好。」而陳穎妍則表示欣賞朗拿甸奴，她說：「每逢大型賽事例如世界盃、歐洲盃咁我都會睇，今次我都捧巴西隊㗎，尤其朗拿甸奴，佢扭波技巧真係好好。」
採訪：卓寶花
攝影：仇志德
運動服提供：興發體育用品有限公司
