公務員減薪單官司，政府連輸兩仗，公務員事務局局長王永平真係頭都大晒，不過，新春大吉，佢都放開心情寫咗封「新春祝願」嘅公開信畀十六萬公僕，勉勵一番。
王局長滿肚墨水，雞年借題發揮，話雄雞報曉，迎接曙光，母雞孵蛋，孕育生命，期望雞年帶畀香港市民光明同生氣勃勃嘅一年。
佢又話喺雞年，香港公務員隊伍會一如以往，堅守崗位服務市民，佢有信心會比去年做得更好，又希望若公務員有值得嘉許嘅地方，市民大眾會鼓勵同支持各政府部門同公務員。其實香港人一直好支持公務員，甚至以佢哋為榮，邊個踩佢哋，十七萬人心中有數。
老董成日話香港已經度過最艱難嘅日子，王永平自然同一口徑，佢祝全港市民同每一位公務員幸福快樂。王永平又教埋大家英文，雞年英文係YearoftheRooster，好彩唔係YearoftheChicken，否則大家有排震啦。
傳真︰2623-9278
電郵︰