老董年年嘅年三十都會去行花市，但今年就唔知點解神神秘秘，到佢落維園十分鐘前，先至通知傳媒，搞到啲傳媒趕頭趕命咁撲去維園，好多記者都遲到。八方年廿九已經問定特首辦，老董幾時去行花市，但特首辦仍然答唔出行程；冇咗林煥光喺度，就連行花市呢啲攞分嘅PRShow都要玩突擊，真冇解。
市民對老董都算客氣，頂多都喺背後細細聲講兩句，話見到老董會「行衰運」，最有吉士反而係個細路女。八方睇有線新聞，見到有個老竇抱住個細路女，老董想走去摸吓佢，但個細路就一手用個吹氣鎚仔，兜野扑落老董度。呢個細路女真係幫咗唔少香港人出番啖氣，抵讚！
老董用咗七百五十蚊，買咗啲陶泥蛋、吹氣雞同埋公仔畀啲孫玩，另外用咗六百六十八蚊買咗馬尾草、火百合、香雪蘭同埋愛麗詩呢幾種花。點解揀馬尾草？一年行運行到尾喎。
傳真︰2623-9278
電郵︰