今日係大年初一，我求大俠首次祝廣大球迷喺雞年波運亨通。今日由黃昏開始有成二十幾場波賭，但係因為大部份球隊陣容唔完整兼有後顧之憂，所以賭波嘅策略，就應該博和，和氣生財。
今日係國際賽日，足智彩總共開咗成二十二場世盃外圍賽同埋友賽。由於歐洲各大聯賽進行得如火如荼，嚟緊周六、日又要打，加上啲友賽又缺乏競賽意義，故此啲大牌球員只要有少少傷，就即刻退隊；好似英格蘭咁，佢哋三大中堅蘇甘保、泰利同李奧費迪南全部唔踢，搞到要由後備到唔後備嘅加歷查同布朗鎮守中路。
至於其他強隊亦有類似嘅情況，例如德國冇普度斯基、法國冇巴夫斯、瑞典冇伊巴謙莫域、意大利則冇迪比亞路同卡斯辛奴。
所謂「和氣生財」，今日幾場友賽大波好似英格蘭對荷蘭、德國對阿根廷，以及法國對瑞典，一於博和買和波三串四，全中有成六十幾倍，幾和味㗎！
雲尼亞里季初由車路士過檔華倫西亞，初頭發展唔錯，點知隊波愈踢愈沉，𠵱家重冇乜機會衞冕西甲㖭！我求大俠收到風，話華倫高層會喺六月有行動，但就唔係炒雲尼亞里魷魚，而係改合約，升佢上神枱做總監。雲尼亞里俾人降職冇面啲，好彩唔使好似喺車仔咁收大信封！
𠵱家喺德甲打緊護級戰嘅羅斯托克，日前向德足總提出推翻上周六打和史浩克04二比二嘅戰果。佢哋話場波只係補時兩分鐘，但史隊艾列頓喺補時三分鐘先追平，所以入球應該作廢。雖然我求大俠好同情佢哋，但如果畀佢哋開咗先例，之後真係有排煩，所以應該推唔翻居多。
唔少人都覺得油王阿巴莫域治淨係識揼錢畀車仔，又唔為俄羅斯國內足運出力。不過，呢個觀點可能好快會改變，因為俄羅斯業餘足球聯賽發表聲明話，會喺四月時提名阿巴莫域治競選俄足總主席。俄國足運近年發展得唔好，國家隊又冇表現，搵阿巴莫域治帶來新衝擊都係好嘅。
卡斯辛奴向來「大唔透」，最近佢話自己有傷拒絕參加對俄羅斯既熱身賽，外界猜測佢又唔生性。不過，教練納比就出來同佢兜，話卡斯辛奴唔係玩嘢，對方重親自去訓練營搵佢傾㖭，最後喺納比同意下返回效力球會羅馬。睇嚟經過多年嘅風風雨雨之後，卡斯辛奴終於大個仔咯！