今日係乙酉年年初一，恭喜大家發財，四季平安，龍馬精神。經過去年十二月二十六日嘅天災，好多老友嘅人生觀都改變咗，搵錢唔係第一要義，最緊要係一家人四季平安，常年無憂；冇健康平安嘅話，搵多多錢都假。
新年前聽到一位老友嘅發財消息，好戥佢高興。十五年前肥佬黎收購RacingWorld（賽馬世界），股權出售人奧馬勝（MatthewOram）留為編輯顧問半年。奧馬勝係劍橋大學學士、碩士，讀歷史，正係陶傑筆下啲英國有教養嘅紳士、首相材料。但奧馬勝當年沾上社會主義蟲（好多劍橋學生皆如是），畢業後走咗去加拿大做礦工，體驗勞動生活，咁就大波歐矣。奧馬勝係聰明人，好快就知道社會主義搵老襯，走咗嚟最走資嘅城市，做香港電台英文台記者，然後創辦RacingWorld、駕駛學院，用資本主義方法賺錢，九七前賣樓賣公司返英國，印印腳退休去也。
奧馬勝嘅賽馬知識好到冇得頂，極有研究，識得養馬投資，佢喺香港養嘅馬，成績普通，最出名就係Starbucks（勁爆星），但喺紐西蘭養咗一匹馬女Marquis，父系血統一般，母系出於名種EightCarat，點知呢匹馬贏咗一級賽，身價暴升，奧馬勝立即將佢退役，拉去與名種配種，三年前第一匹周歲馬馬女出售，拍賣價一百四十萬紐元，兩年前第二匹周歲馬出售，拍賣價百一萬紐元，今年卡拉卡拍賣會傳來捷報，又有一匹出售，拍賣價九十五萬紐元，嘩，紐元滙價一路上升，奧馬勝雖已生活無憂，但有一匹Marquis定期為佢帶來幾百萬港紙（稅前），真係羨慕到左丁山流口水，自己跟奧馬勝學過一招半式，恨做名種馬馬主好耐咯，既然恨唔到，願借此一角，向奧馬勝拜年，祝佢永遠好運，再祝各位老友，馬場長勝。