送舊迎新，雞年伊始，祝各位今年豐衣足食、身體健康、舊年支持蘋果基金嘅，繼續多多支持！
呢幾年，香港經濟經歷過山車一樣嘅衝擊，百業受創，但蘋果基金靠住廣大讀者一直風雨支持，捐款數字冇乜大起大跌，舊年全年共收捐款超過二千一百萬，即每日收約五萬八千元。
呢筆錢重未計舊年年尾先成立嘅「南亞海嘯救災」專戶所籌到嘅巨額善款，呢次世紀災難開創咗蘋果基金喺最短時間籌到最多善款嘅紀錄——短短兩個禮拜內籌到超過一千萬，呢個係社會上下一心嘅成果，係蘋果基金嘅Fans發揮人性光輝嘅見證。
我哋做咗啲乜？數數手指，除咗我哋兩個委員會——「愛心基金」同埋「教育基金」嘅年度工作，重有大家日日喺報紙睇到嘅求助個案。值得一提係，隨住醫管局好多新藥都要由用者自付，我哋近年收到唔少求助籌款買新藥嘅個案，佢哋唔係籌一千幾百，講緊係十萬八萬，而讀者嘅捐款往往嚟得不遲不早、不多不少，有時反應之大甚至超出所想所求。
各界亦好關注貧家孩子嘅需要，有讀者一擲十萬畀我哋喺聖誕節請啲小朋友食自助餐同埋睇音樂劇，除咗捐錢，有商家捐護脊書包，有團體免費請小朋友睇馬戲、去海洋公園玩。
基金一直致力扶貧，舊年更開始大派「愛心福袋」，主要送畀低收入及弱勢家庭一袋一袋滿載食物嘅福袋，令三餐不繼嘅家庭可以餐餐有餸加。
暖流熱線
電話：29908688
傳真：23702192
電郵：