余若薇同梁家傑平日好老友，政見亦非常接近，唔知係咪真係心有靈犀，兩個人一講到雞年願望，都話政通最緊要。余若薇話，曾慶紅副主席成日講「天時、地利、人和」六字真言，香港𠵱家有晒天時同地利，只係獨欠政通，所以人和不得；佢最想見到政制發展能夠令大家都滿意，香港人雞年龍馬精神，身體健康。
八方問余若薇過年去邊？佢笑住話留港消費同休息。原來余大狀同丈夫胡健維醫生平日都好忙，所以年年都趁過年唞唞，瞓番夠本，去年宵都只不過係做節目，佢哋連行花市都好少去，真係比較西化。
至於三個女，只有細女喺身邊，兩個大嘅分別喺美英留學，冇返香港過年。唔講唔知，民主女神三個女，一個讀緊大三，一個中六，一個小六，真係大中小都有，所以一講到教育問題，邊個都唔夠佢熟！
傳真︰2623-9278
電郵︰