劉德華今晚演出中央台的春節聯歡晚會，大會安排一班小朋友扮成的小雞及兩個日本機械人為他伴舞，又特製華仔的大頭公仔表演歌舞，向全中國人拜年。
劉德華正身在北京宣傳賀年歌《恭喜發財》，並準備今晚演出中央台的《春節聯歡晚會》，成龍與兒子房祖名、容祖兒、蔡依林及那英等都會出席，華仔前晚參與綵排，大會特別製造了包括成龍及華仔等的大頭公仔，於開場時一同載歌載舞，十分趣怪。
華仔打頭陣獻唱時，與一班舞蹈員及由小朋友化身的可愛小雞載歌載舞，大唱賀年歌《恭喜發財》，其中更有兩個由日本運到的sony機械人跟華仔一同跳舞，場面十分熱鬧。
華仔看到機械人跳舞，讚口不絕說：「個機械人跳得好靈活，真人一樣，最緊要拍子好準，我諗遲吓屋企啲工人全部都係機械人都唔奇，不過我都係鍾意有人情味嘅嘢，我唔想將來身邊全部係冷冰冰嘅機器，咁樣人與人之間就會好疏離，機械人都係做玩伴啦！」
華仔計劃今晚演出後，便與張藝謀及馮小剛吃團年飯及放炮仗，但他得悉北京禁放炮仗後，只好打消念頭，華仔說：「我哋唔應該犯禁，記得我細個時住大埔，成日玩炮仗，試過玩龍吐珠燒爛件衫，其實好危險。」
華仔又透露離港前，劉媽媽已將碌柚葉放進其行李箱，讓他今晚年三十晚沖涼，華仔說：「我重帶埋紅睡衣、新衫同紅色波鞋，年初一着住返香港。」
此外，華仔早前為無綫拍攝賀年短片，親自提了個「強」字祝福香港人，他說：「我祝願香港喺雞年經濟變強，人人身體強壯冇病痛。」
