任賢齊日前到攝氏零下十五度嘅瀋陽，出席「齊長大——我們一起喊媽媽」慈善籌款活動。今次活動搞咗個名為「齊長大」基金會，基金會成立後嘅首項任務，就係成立「任賢齊失聰兒童康復中心」同埋為失聰小朋友提供治療。
當中獲得三年免費治療嘅失聰小朋友亦有到場多謝小齊，小齊就帶咗啲新年禮物送畀佢哋。其實小齊嘅聽覺都有少少問題，所以佢身體力行喺會上拍賣自己嘅簽名海報同唱片，甚至有人出到高價五千蚊人民幣嚟買小齊嘅唱片㖭，結果籌得七千四百蚊人民幣同一百蚊美金（約七百八十港元）。
另外，小齊又喺慈善握手會中義賣三千張新碟，收益撥捐「齊長大」基金，大會特別安排二百名公安維持秩序，重叫商場嘅店舖關門，以免造成混亂。不過賣晒唱片後，仍然有歌迷排隊，小齊唔想fans捱冷，所以用佢一早準備嘅蓋章代替簽名，一於皆大歡喜。小齊新年黃金檔冇淨係掛住搵銀，重積極行善，確係抵讚！
黃伊汶（Emme）前晚去將軍澳電視廣播城錄影《勁歌金曲》，同EO2鬥歌鬥舞，俾人叫做四王一后。Emme話今次排舞好有壓力，因為六個鐘頭就要搞掂。至於話許志安個唱想請佢一齊喺台上沖涼表演，Emme就話度唔到期，唔係怕性感，佢重賣口乖話安仔係佢偶像。
聽日係大年初一，好多人都出外旅遊避年，潘廸生噚日就同家人現身機場，潘生做開大生意，寧舍小心，噚日安排六個保鑣送佢哋一家到機場閘口，咁就玩都玩得安心。另外又見到謝賢同埋女友返溫哥華同家人過年，而汪明荃噚日亦獨自離港。
陳海琪噚日喺將軍澳錄影《香港直播》，對於有傳謝偉俊將會取代佢主持呢個節目，佢話：「我唔知喎！我會尊重無綫決定。今次係我自己辭職，只可以話呢個決定有好多原因，娛樂圈始終係一個鬥獸場，唔係好適合我。」講到信唔信白韻琴篤背脊，佢話：「我唔敢信！」
曾志偉近排忙緊拍攝電影《黑白戰場》，佢喺片中扮演黑社會大哥「龍老四」，為咗突出造型，曾志偉每次開工前要花上兩個鐘頭畫上一對又濃又粗嘅眉毛，令形象更具煞氣。
不過曾志偉成日咁搞笑，唔知啲觀眾見到佢咁認真嘅濃眉大佬，會唔會以為係獎門人駕到啦？
