歐洲足協反假波
球驗客手記：擬球圈落注正屎橋

呢排最hit嘅國際球壇新聞，相信非德國球壇球證涉賭波同埋收受金錢而吹黑哨、球員又受賄莫屬；由於呢單假波案牽連愈嚟愈廣泛，連歐洲足協都出嚟話打算立例，禁止麾下成員國嘅球員、球證同埋球會領導層賭波，以根治問題。
歐洲足協咁做當然係出於好意，不過，我求大俠都覺得就算真係立例，相信成效都唔係咁大喇，因為好似香港馬會咁，佢哋夠唔畀騎師同埋職員買馬，但係以前咪證實有老細咪一樣可以替騎師落注。推而廣之，就算歐洲足協唔畀球員同球證等等買波，佢哋咪一樣可以叫朋友幫手買，點杜絕得咁多呢？
其實我求大俠認為如果想球壇乾淨，最重要都係注意有份參與嘅人嘅德育教導，令佢哋潔身自愛，等佢哋知道獲得呢啲咁嘅快錢，最終只係會拖垮球壇、玩死自己，咁佢哋自然唔會參與不法活動啦！

籃球美足你贏我輸費城擁躉悲喜交集
NBA嘅費城76人噚晚主場贏咗快艇，以為對稍後出戰美式足球「超級碗」嘅老鷹隊係好先兆，點知老鷹最後都僅敗，錯失四十五年來首次染指NFL錦標嘅滋味。最諷刺係76人自己就贏波輸盤，但相反老鷹就輸波贏盤，咁對「用錢」落注支持費城兩支球隊嘅擁躉而言，都算有喜有悲囉！

轉投瑞乙重掛住迪馬天奴正一大細路
早排同羅馬決裂嘅十八歲小將迪馬天奴，出走到瑞士踢乙組貝利桑拿後立志將來重投母會。其實由佢唔接受會方續約條件到離巢至今，表現好世故；衰在當佢被問及最掛住羅馬咩人與事，竟然答係留喺練習場嗰部playstation遊戲機，話一定返去攞番。小朋友真係小朋友。

坐祖記冷板國家隊唔吼迪比亞路一沉百踩
意大利點兵，「金童」迪比亞路果然名落孫山。最近佢被祖雲達斯教練卡比路貶為大後備（對巴勒莫落後緊都唔用佢），想唔落選都難。卡比路對國家隊影響力不嬲好大，好似當年一手扶番起彭路基、提拔迪羅斯，都帶挈佢兩個獲國家隊召用。「金童」想獲重召，就有難度啦。

演球迷奇遇記擋車占士抵坐正英軍門神
英超聯球隊曼城喺星期日嘅聯賽可以作客打和榜首車路士○比○，門將占士係最大功臣。占士雖然成日喺陣上都騰騰震，不過前日就表現好好，左飛右撲，令到車仔一眾攻擊球員望門興歎，難怪占士好大口氣咁話，喺星期三英格蘭主場迎戰荷蘭嘅友賽，正選門將之位非佢莫屬。