近年有啲親北京政黨亦不讓民主派專美，殺入維園年宵擺檔，同市民寫吓揮春、派吓紀念品，都係幫政黨軟銷嘅好方法，但礙於本身保守嘅政治立場，時不時都會出現啲尷尬場面。
八方有位朋友噚日到民建聯嘅維園攤檔，見到有個義工幫人寫咗張「民主中國」揮春，重諗住呢個政黨政治上咁進步，就即刻行埋去同個義工講，想寫番張「○七○八普選」揮春，呢位義工隨即面有難色，始終唔肯落筆。
八方呢位朋友心諗，可能揮春內容有違民建聯政黨立場，所以退而求其次叫佢寫張「早日普選」。
誰不知呢位義工實行裝聾扮啞，私下竄改呢位朋友嘅要求，大筆一揮，寫咗張「早日抱孫」出嚟，搞到人唔知好嬲定好笑。八方朋友當然唔收貨，最後搞咗好耐，義工大叔先死死地氣寫咗張「早日普選」出嚟，成個過程拖拖拉拉，似足民建聯對全面普選嘅態度一樣。
奉勸各位有興趣寫番張民主揮春嘅朋友，千祈咪對民建聯心存幻想，不如行多兩步，過對面支聯會嘅攤檔搵華叔寫冇咁嬲。
傳真︰2623-9278
電郵︰