與電腦Ｊ等去上海總會食飯，見到大人物Ｖ博士搵人，原來貴賓房在二樓，但好多人約食飯，冇講明，往往客人走咗去一樓。Ｖ博士等𨋢上二樓之時，左丁山與佢打招呼，兼講聲恭喜發財，拜個早年。Ｖ博士冇打呔，狀甚輕鬆，左丁山問佢：「上市怕唔怕有風波呀？」Ｖ博士笑曰：「風波與我何干，我負責為公司增值而已，上唔上市唔係我決定嘅。」講得真好，做義務工作唔好太上心，要睇埋政治現實，無謂強求，總之自己會做到最好，交番張靚成績表出嚟。上市之事，有陣時係政治事件，冇法子估計到會遇到乜嘢意外嘅。
香港啲議員，弊在社會主義思想入晒腦，佢哋讀書之時，幾乎全部係左佬思維，信社會主義多過信資本主義，年紀大咗之後，右腦爭取自由選舉，左腦仍然係馬克思嗰套，支持大政府，反對私有化，反對大財團，逢商必奸，逢老闆必剝削，逢專利權必定暴利，逢政府收費增加必定係壓榨基層、犧牲中產，逢減赤就鬧肥上瘦下，逢按照公務員薪酬請工人就係浪費納稅人公帑，逢按照市場水平請工人就係無良僱主……
最弊嘅，議員咁講，傳媒跟住大合唱，搞到經濟系教授嘆一句：「沒有冷靜思考的空間。」唯一安樂土係《蘋果》評論版與「蘋論」，堅持市場機制、資本主義體系，如傳媒中一股清泉。可惜呢，連《蘋果》記者編輯都唔識睇，或者唔肯睇，否則佢哋嘅報道與新聞標題邊度會跟住左派議員指揮棒大合唱㗎？
領匯上市失敗於前，機管局私有化上市未開波就飽受各方攻擊，睇落前路維艱。立法會已完全受左派思想議員控制，有尊貴人士話機場既已成為世界最佳，何必上市？真係夏蟲不可語冰也。