日本偶像組合Morning娘前成員安倍夏美，喺上年十二月被踢爆喺佢嘅散文集入面，抄襲aiko及小室哲哉等歌手嘅歌詞，當成自己嘅創作，即時被事務所雪藏兩個月自我反省，連年尾舉行嘅《紅白大賽》亦被迫辭演。噚日中午，安倍終於獲得解凍，重舉行記者會宣布會喺星期五舉行嘅演唱會上正式復出。
自從抄歌事件被踢爆之後，安倍已即時以傳真謝罪。而喺噚日嘅記者會上，安倍亦口震震咁再次親自向公眾道歉，佢話好抱歉為大家帶嚟咁多麻煩，喺呢兩個月佢已經好好反省，以後會從頭開始好好努力。
安倍今次係同Morning娘監製TSUNKU一齊出席記者會，而喺噚日記者會上，安倍比起十二月初被日本雜誌《FRIDAY》偷拍時瘦咗唔少，睇嚟今次事件對佢都造成好大打擊。
不過就有日本傳媒認為今次抄歌事件，令到安倍嘅形象大受影響。加上佢自獨立發展之後，不但唱片成績唔理想，連由佢主演嘅日劇《小狗華爾滋》收視都非常慘淡，只得8%，所以對佢復出之後嘅前途都唔敢樂觀。